Do | II | III | IV | V | VI | Sa |
---|---|---|---|---|---|---|
1 | 2 | 3 | 4 | 5 | 6 | |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 |
Feria Tertia infra Octavam Paschæ
Communia applicare
horas componere
ordinarium
officum defunctorum
dedicationis ecclesiæ
BREVIARIUM ROMANUM
V. Deus, in adiutórium meum inténde.
R.
Dómine, ad adiuvándum me festína.
Glória Patri et Fílio et Spirítui Sancto,
sicut erat in princípio et nunc et semper
et in sǽcula sæculórum. Amen. Allelúia.
HYMNUS
Ad cenam Agni próvidi,
stolis salútis cándidi,
post tránsitum maris Rubri
Christo canámus príncipi.
Cuius corpus sanctíssimum
in ara crucis tórridum,
sed et cruórem róseum
gustándo, Deo vívimus.
Protécti paschæ véspero
a devastánte ángelo,
de Pharaónis áspero
sumus erépti império.
Iam pascha nostrum Christus est,
agnus occísus ínnocens;
sinceritátis ázyma
qui carnem suam óbtulit.
O vera, digna hóstia,
per quam frangúntur tártara,
captíva plebs redímitur,
reddúntur vitæ prǽmia!
Consúrgit Christus túmulo,
victor redit de bárathro,
tyránnum trudens vínculo
et paradísum réserans.
Esto perénne méntibus
paschále, Iesu, gáudium
et nos renátos grátiæ
tuis triúmphis ággrega.
Iesu, tibi sit glória,
qui morte victa prǽnites,
cum Patre et almo Spíritu,
in sempitérna sǽcula. Amen.
PSALMODIA
Ant. 1 Venérunt ad monuméntum María Magdaléne et áltera María vidére sepúlcrum, allelúia.
Oportet illum regnare, donec ponat omnes inimicos sub pedibus eius. (1 Cor 15, 25)
1 Dixit Dóminus Dómino meo: *
"Sede a dextris meis,
donec ponam inimícos tuos *
scabéllum pedum tuórum." –
2 Virgam poténtiæ tuæ emíttet Dóminus ex Sion: *
domináre in médio inimicórum tuórum.
3 Tecum principátus in die virtútis tuæ, †
in splendóribus sanctis, *
ex útero ante lucíferum génui te. –
4 Iurávit Dóminus et non pænitébit eum: *
"Tu es sacérdos in ætérnum secúndum órdinem Melchísedech."
5 Dóminus a dextris tuis, *
conquassábit in die iræ suæ reges. –
6 [Iudicabit in nationibus: cumulantur cadavera, *
conquassabit capita in terra spatiosa.]
7 De torrénte in via bibet, *
proptérea exaltábit caput.
Glória Patri et Fílio *
et Spirítui Sancto,
sicut erat in princípio et nunc et semper *
et in sǽcula sæculórum. Amen.
Ant. 1 Venérunt ad monuméntum María Magdaléne et áltera María vidére sepúlcrum, allelúia.
Ant. 2 Veníte, et vidéte locum ubi pósitus erat Dóminus, allelúia.
Cognoscite étiam vos exiisse ab Ægýpto, qui huic sǽculo renuntiastis. (S. Augustinus)
1 In éxitu Israel de Ægýpto, *
domus Iacob de pópulo bárbaro,
2 factus est Iuda sanctuárium eius, *
Israel potéstas eius. –
3 Mare vidit et fugit, *
Iordánis convérsus est retrórsum;
4 montes saltavérunt ut aríetes, *
et colles sicut agni óvium. –
5 Quid est tibi, mare, quod fugísti? *
Et tu, Iordánis, quia convérsus es retrórsum?
6 Montes, quod saltástis sicut aríetes, *
et colles, sicut agni óvium? –
7 A fácie Dómini contremísce, terra, *
a fácie Dei Iacob,
8 qui convértit petram in stagna aquárum *
et sílicem in fontes aquárum.
Glória Patri et Fílio *
et Spirítui Sancto,
sicut erat in princípio et nunc et semper *
et in sǽcula sæculórum. Amen.
Ant. 2 Veníte, et vidéte locum ubi pósitus erat Dóminus, allelúia.
Ant. 3 Ait Iesus: Nolíte timére; ite, nuntiáte frátribus meis ut eant in Galilǽam; ibi me vidébitis, allelúia.
Sequens canticum dicitur cum Allelúia prouti hic notatur, quando cum cantu profertur; in recitatione vero sufficit ut Allelúia dicatur in initio et fine uniuscuiusque strophæ.
Canticum
De nuptiis Agni
Allelúia.
1 Salus et glória et virtus Deo nostro, *
(R. Allelúia.)
2 quia vera et iusta iudícia eius.
R. Allelúia (allelúia).
Allelúia.
5 Laudem dícite Deo nostro, omnes servi eius *
(R. Allelúia.)
et qui timétis eum, pusílli et magni!
R. Allelúia (allelúia).
Alléluia.
6 Quóniam regnávit Dóminus, Deus noster omnípotens *
(R. Allelúia.)
7 Gaudeámus et exsultémus et demus glóriam ei.
R. Allelúia (allelúia).
Allelúia.
Quia venérunt núptiæ Agni, *
(R. Allelúia.)
et uxor eius præparávit se.
R. Allelúia (allelúia).
Glória Patri et Fílio *
et Spirítui Sancto,
sicut erat in princípio et nunc et semper *
et in sǽcula sæculórum. Amen.
Ant. 3 Ait Iesus: Nolíte timére; ite, nuntiáte frátribus meis ut eant in Galilǽam; ibi me vidébitis, allelúia.
LECTIO BREVIS
RESPONSORIUM BREVE
Loco responsorii dicitur:
Ant. Hæc dies quam fecit Dóminus: exsultémus et lætémur in ea, allelúia.
MAGNIFICAT
Ad Magnificat, ant. Dum flerem ad monuméntum, vidi Dóminum meum, allelúia.
46 Magníficat *
ánima mea Dóminum,
47 et exsultávit spíritus meus *
in Deo salvatóre meo,
48 quia respéxit humilitátem ancíllæ suæ. *
Ecce enim ex hoc beátam me dicent omnes generatiónes,
49 quia fecit mihi magna, qui potens est, *
et sanctum nomen eius,
50 et misericórdia eius in progénies et progénies *
timéntibus eum.
51 Fecit poténtiam in bráchio suo, *
dispérsit supérbos mente cordis sui;
52 depósuit poténtes de sede *
et exaltávit húmiles;
53 esuriéntes implévit bonis *
et dívites dimísit inánes.
54 Suscépit Israel púerum suum, *
recordátus misericórdiæ,
55 sicut locútus est ad patres nostros, *
Abraham et sémini eius in sǽcula.
Glória Patri et Fílio *
et Spirítui Sancto,
sicut erat in princípio et nunc et semper *
et in sǽcula sæculórum. Amen.
Ad Magnificat, ant. Dum flerem ad monuméntum, vidi Dóminum meum, allelúia.
PRECES
Christo, qui in grémio terræ commorátus, lumen novæ glóriæ vidit, læti clamémus:
Rex glóriæ, audi nos.
Pro epíscopis, presbýteris et diacónibus, ut ministério cum sedulitáte fungántur,
— et pópulum ad omne opus bonum parátum tibi prǽbeant, te rogámus, Dómine.
Pro doctóribus, qui Ecclésiæ tuæ sátagunt servíre,
— ut corde puro veritátem tuam inquírant, te rogámus, Dómine.
Pro Ecclésiæ fidélibus, ut bonum certent fídei certámen,
— et, cursum consummántes, prǽmia regni tui accípiant, te rogámus, Dómine.
Tu, qui in cruce chirógraphum damnatiónis nostræ fixísti et delésti,
— víncula nostra solve nosque a ténebris líbera.
Tu qui, ad ínferos descéndens, portas eórum aperuísti,
— fratres nostros defúnctos in regnum tuum admítte.
Pater noster, qui es in cælis,
sanctificétur nomen tuum;
advéniat regnum tuum;
fiat volúntas tua, sicut in cælo et in terra.
Panem nostrum cotidiánum da nobis hódie;
et dimítte nobis débita nostra,
sicut et nos dimíttimus debitóribus nostris;
et ne nos indúcas in tentatiónem;
sed líbera nos a malo.
Pater noster.....
ORATIO
Deus, qui paschália nobis remédia contulísti, pópulum tuum cælésti dono proséquere, ut,
perféctam libertátem assecútus, in cælis gáudeat unde nunc in terris exsúltat. Qui tecum vivit et regnat in unitáte Spíritus Sancti, Deus, per ómnia sǽcula sæculórum.
Deinde, si præest sacerdos vel diaconus, populum dimittit, dicens:
Dóminus vobíscum.
R. Et cum spíritu tuo.
Benedícat vos omnípotens Deus,
Pater, et Fílius, † et Spíritus Sanctus.
R. Amen.
Vel alia formula benedictionis, sicut in Missa.
Et, si fit dimissio, sequitur invitatio:
Ite in pace. Allelúia, allelúia.
R. Deo grátias. Allelúia, allelúia.
Absente sacerdote vel diacono, et in recitatione a solo, sic concluditur:
Dóminus nos benedícat,
et ab omni malo deféndat,
et ad vitam perdúcat ætérnam.
R. Amen.
Breviarium Romanum
textus in versione electronica © 2000-2023 Ing. Karel Mracek Dr.h.c. (fr. Pavel, diaconus, CZ)