BREVIARIUM ROMANUM

27 aprilis 2010
TEMPUS PASCHALE, hebd. IV
Hebdomada IV

V. Deus, in adiutórium meum inténde.
R. Dómine, ad adiuvándum me festína.

Glória Patri et Fílio et Spirítui Sancto,
sicut erat in princípio et nunc et semper
et in sǽcula sæculórum. Amen.   Allelúia.

HYMNUS

Iam surgit hora tértia,
qua Christus ascéndit crucem;
nil ínsolens mens cógitet,
inténdat afféctum precis.

Qui corde Christum súscipit,
innóxium sensum gerit
votísque præstat sédulis
Sanctum meréri Spíritum.

Hæc hora, quæ finem dedit
diri vetérno críminis;
hinc iam beáta témpora
cœpére Christi grátia.

Iesu, tibi sit glória,
qui morte victa prǽnites,
cum Patre et almo Spíritu,
in sempitérna sǽcula. Amen.

PSALMODIA

Ant. Allelúia, allelúia, allelúia.

¹³⁷ Iustus es, Dómine, *
         et rectum iudícium tuum.
¹³⁸ Mandásti in iustítia testimónia tua *
         et in veritáte nimis. –

¹³⁹ Consúmpsit me zelus meus, *
         quia oblíti sunt verba tua inimíci mei.
¹⁴⁰ Ignítum elóquium tuum veheménter, *
         et servus tuus diléxit illud. –

¹⁴¹ Adulescéntulus sum ego et contémptus; *
         mandáta tua non sum oblítus.
¹⁴² Iustítia tua iustítia in ætérnum, *
         et lex tua véritas. –

¹⁴³ Tribulátio et angústia invenérunt me; *
         præcépta tua delectátio mea est.
¹⁴⁴ Iustítia testimónia tua in ætérnum; *
         intelléctum da mihi, et vivam.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Hæc est hora vestra et potestas tenebrarum. (Lc 22, 53)

² Dómine, Deus salútis meæ, *
      in die clamávi et nocte coram te.
³ Intret in conspéctu tuo orátio mea; *
      inclína aurem tuam ad precem meam. –

⁴ Quia repléta est malis ánima mea, *
      et vita mea inférno appropinquávit.
⁵ Æstimátus sum cum descendéntibus in lacum, *
      factus sum sicut homo sine adiutório.
⁶ Inter mórtuos liber, *
      sicut vulneráti dormiéntes in sepúlcris;
   quorum non es memor ámplius, *
      et ipsi de manu tua abscíssi sunt. –

⁷ Posuísti me in lacu inferióri, *
      in tenebrósis et in umbra mortis.
⁸ Super me gravátus est furor tuus, *
      et omnes fluctus tuos induxísti super me.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

⁹ Longe fecísti notos meos a me, *
       posuísti me abominatiónem eis;
    conclúsus sum et non egrédiar. *
¹⁰    Oculi mei languérunt præ afflictióne.
    Clamávi ad te, Dómine, tota die, *
       expándi ad te manus meas.

¹¹ Numquid mórtuis fácies mirabília, *
       aut surgent umbræ et confitebúntur tibi?
¹² Numquid narrábit áliquis in sepúlcro misericórdiam tuam *
       et veritátem tuam in loco perditiónis?
¹³ Numquid cognoscéntur in ténebris mirabília tua *
       et iustítia tua in terra obliviónis? –

¹⁴ Et ego ad te, Dómine, clamávi, *
       et mane orátio mea prævéniet te.
¹⁵ Ut quid, Dómine, repéllis ánimam meam, *
       abscóndis fáciem tuam a me?
¹⁶ Pauper sum ego et móriens a iuventúte mea; *
       portávi pavóres tuos et conturbátus sum.
¹⁷ Super me transiérunt iræ tuæ, *
       et terróres tui excidérunt me.
¹⁸ Circuiérunt me sicut aqua tota die, *
       circumdedérunt me simul.
¹⁹ Elongásti a me amícum et próximum, *
       et noti mei sunt ténebræ.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. Allelúia, allelúia, allelúia.

LECTIO BREVIS

ORATIO

Orémus:

Præsta, quǽsumus, omnípotens Deus, ut, qui resurrectiónis domínicæ mystéria cólimus, redemptiónis nostræ suscípere lætítiam mereámur. Per Christum Dóminum nostrum.

    Deinde, saltem in celebratione communi, additur acclamatio:

Benedicámus Dómino.
R. Deo grátias.

Breviarium Romanum

textus in versione electronica © 2000-2023 Ing. Karel Mracek Dr.h.c. (fr. Pavel, diaconus, CZ)