BREVIARIUM ROMANUM

31 maius 2011
In visitatione beátæ Mariæ Virginis

V. Deus, in adiutórium meum inténde.
R. Dómine, ad adiuvándum me festína.

Glória Patri et Fílio et Spirítui Sancto,
sicut erat in princípio et nunc et semper
et in sǽcula sæculórum. Amen.   Allelúia.

HYMNUS

Iam surgit hora tértia,
qua Christus ascéndit crucem;
nil ínsolens mens cógitet,
inténdat afféctum precis.

Qui corde Christum súscipit,
innóxium sensum gerit
votísque præstat sédulis
Sanctum meréri Spíritum.

Hæc hora, quæ finem dedit
diri vetérno críminis;
hinc iam beáta témpora
cœpére Christi grátia.

Iesu, tibi sit glória,
qui morte victa prǽnites,
cum Patre et almo Spíritu,
in sempitérna sǽcula. Amen.

PSALMODIA

Ant. Allelúia, allelúia, allelúia.

⁴⁹ Memor esto verbi tui servo tuo, *
      in quo mihi spem dedísti.
⁵⁰ Hoc me consolátum est in humiliatióne mea, *
    quia elóquium tuum vivificávit me. –

⁵¹ Supérbi derisérunt me veheménter; *
      a lege autem tua non declinávi.
⁵² Memor fui iudiciórum tuórum a sǽculo, Dómine, *
      et consolátus sum. –

⁵³ Indignátio ténuit me *
      propter peccatóres derelinquéntes legem tuam.
⁵⁴ Cántica factæ sunt mihi iustificatiónes tuæ *
      in loco peregrinatiónis meæ. –

⁵⁵ Memor fui nocte nóminis tui, Dómine, *
    et custódiam legem tuam.
⁵⁶ Hoc factum est mihi, *
      quia mandáta tua servávi.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Omnes peccaverunt et egent gloria Dei. (Rom 3, 23)

¹ Dixit insípiens in corde suo: "Non est Deus." †
²    Corrúpti sunt et abominatiónes operáti sunt; *
      non est qui fáciat bonum.
³ Deus de cælo prospéxit super fílios hóminum, *
      ut vídeat si est intéllegens aut requírens Deum. –

⁴ Omnes declinavérunt, simul corrúpti sunt; *
      non est qui fáciat bonum, non est usque ad unum.
⁵ Nonne scient omnes, qui operántur iniquitátem, *
      qui dévorant plebem meam ut cibum panis? –

   Deum non invocavérunt; *
⁶     illic trepidavérunt timóre, et non erat timor.
   Quóniam Deus dissipávit ossa eórum, qui te obsidébant *
      confúsi sunt, quóniam Deus sprevit eos.
⁷ Quis dabit ex Sion salutáre Israel? †
      Cum convérterit Deus captivitátem plebis suæ, *
      exsultábit Iacob et lætábitur Israel.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Orat propheta, ut in nomine Domini a persequentium malignitate liberetur. (Cassiodorus)

³ Deus, in nómine tuo salvum me fac *
      et in virtúte tua iúdica me.
⁴ Deus, exáudi oratiónem meam, *
      áuribus pércipe verba oris mei! –

⁵ Quóniam supérbi insurrexérunt advérsum me, †
      et fortes quæsiérunt ánimam meam *
      et non proposuérunt Deum ante conspéctum suum.
⁶ Ecce enim Deus ádiuvat me, *
      et Dóminus suscéptor est ánimæ meæ. –

⁸ Voluntárie sacrificábo tibi, *
      confitébor nómini tuo, Dómine, quóniam bonum est;
⁹ quóniam ex omni tribulatióne erípuit me, *
      et super inimícos meos despéxit óculus meus. –

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. Allelúia, allelúia, allelúia.

LECTIO BREVIS
Benedícta tu es, fília, a Deo excélso præ ómnibus muliéribus, quæ sunt super terram. Et benedíctus Dóminus, Deus noster, qui creávit cælum et terram, qui diréxit te in vulnus cápitis príncipis inimicórum nostrórum. Quóniam non discédet laus tua a corde hóminum memorántium virtútis Dei usque in sempitérnum.


V. Beáti qui áudiunt verbum Dei. Allelúia.
R. Et custódiunt illud. Allelúia.

ORATIO

Orémus:

Omnípotens sempitérne Deus, qui beátam Vírginem Maríam, Fílium tuum gestántem, ad visitándam Elísabeth inspirásti, præsta, quǽsumus, ut, afflánti Spirítui obsequéntes, cum ipsa te semper magnificáre possímus. Per Christum Dóminum nostrum.

    Deinde, saltem in celebratione communi, additur acclamatio:

Benedicámus Dómino.
R. Deo grátias.

Breviarium Romanum