BREVIARIUM ROMANUM

16 maius 2019
TEMPUS PASCHALE, hebd. IV
Hebdomada IV

V. Deus, in adiutórium meum inténde.
R. Dómine, ad adiuvándum me festína.

Glória Patri et Fílio et Spirítui Sancto,
sicut erat in princípio et nunc et semper
et in sǽcula sæculórum. Amen.   Allelúia.

HYMNUS

Iam surgit hora tértia,
qua Christus ascéndit crucem;
nil ínsolens mens cógitet,
inténdat afféctum precis.

Qui corde Christum súscipit,
innóxium sensum gerit
votísque præstat sédulis
Sanctum meréri Spíritum.

Hæc hora, quæ finem dedit
diri vetérno críminis;
hinc iam beáta témpora
cœpére Christi grátia.

Iesu, tibi sit glória,
qui morte victa prǽnites,
cum Patre et almo Spíritu,
in sempitérna sǽcula. Amen.

PSALMODIA

Ant. Allelúia, allelúia, allelúia.

¹⁵³ Vide humiliatiónem meam et éripe me, *
         quia legem tuam non sum oblítus.
¹⁵⁴ Iúdica causam meam et rédime me; *
         propter elóquium tuum vivífica me. –

¹⁵⁵ Longe a peccatóribus salus, *
         quia iustificatiónes tuas non exquisiérunt.
¹⁵⁶ Misericórdiæ tuæ multæ, Dómine; *
         secúndum iudícia tua vivífica me. –

¹⁵⁷ Multi, qui persequúntur me et tríbulant me; *
         a testimóniis tuis non declinávi.
¹⁵⁸ Vidi prævaricántes, et tǽduit me, *
         quia elóquia tua non custodiérunt. –

¹⁵⁹ Vide quóniam mandáta tua diléxi, Dómine; *
         secúndum misericórdiam tuam vivífica me.
¹⁶⁰ Princípium verbórum tuórum véritas, *
         in ætérnum ómnia iudícia iustítiæ tuæ.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

„Benedicat te Dominus ex Sion“, id est: ex Ecclésia sua. (Arnobius)

¹ Beátus omnis, qui timet Dóminum, *
      qui ámbulat in viis eius. –

² Labóres mánuum tuárum manducábis, *
      beátus es, et bene tibi erit.
³ Uxor tua sicut vitis fructífera *
      in latéribus domus tuæ;
   fílii tui sicut novéllæ olivárum *
      in circúitu mensæ tuæ. –

⁴ Ecce sic benedicétur homo, *
      qui timet Dóminum.
⁵ Benedícat tibi Dóminus ex Sion, *
      et vídeas bona Ierúsalem ómnibus diébus vitæ tuæ;
⁶ et vídeas fílios filiórum tuórum. *
      Pax super Israel!

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ecclésia loquitur de iis quæ tolerat. (S. Augustinus)

¹ Sæpe expugnavérunt me a iuventúte mea, *
      dicat nunc Israel,
² sæpe expugnavérunt me a iuventúte mea, *
      étenim non potuérunt advérsum me.
³ Supra dorsum meum aravérunt aratóres, *
      prolongavérunt sulcos suos.
⁴ Dóminus autem iustus *
      concídit cervíces peccatórum. –

⁵ Confundántur et convertántur retrórsum *
      omnes, qui odérunt Sion.
⁶ Fiant sicut fenum tectórum *
      quod, priúsquam evellátur, exáruit;
⁷ de quo non implévit manum suam, qui metit, *
      et sinum suum, qui manípulos cólligit.
⁸ Et non dixérunt, qui præteríbant: †
      „Benedíctio Dómini super vos, *
      benedícimus vobis in nómine Dómini.“

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. Allelúia, allelúia, allelúia.

LECTIO BREVIS

ORATIO

Orémus:

Deus, qui humánam natúram supra primæ oríginis réparas dignitátem, réspice ad pietátis tuæ ineffábile sacraméntum, ut, quos regeneratiónis mystério dignátus es innováre, in his dona tuæ perpétuæ grátiæ benedictionísque consérves. Per Christum Dóminum nostrum.

    Deinde, saltem in celebratione communi, additur acclamatio:

Benedicámus Dómino.
R. Deo grátias.

Breviarium Romanum

textus in versione electronica © 2000-2023 Ing. Karel Mracek Dr.h.c. (fr. Pavel, diaconus, CZ)