☼ lat ☰

BREVIARIUM ROMANUM

28 october 2021
SS. Simonis et Iudæ, apostolorum


Nomen Simonis ponitur undecimo loco in elencho Apostolorum. Nihil scitur de illo, nisi quod cognominabatur Cananæus seu «Zelotes». Iudas, qui et Thaddæus, ille apostolus est qui, in cena novissima, rogavit Dominum quare se manifestasset tantum suis discipulis et non mundo (Io 14, 22).

AD TERTIAM

V. Deus, in adiutórium meum inténde.
R. Dómine, ad adiuvándum me festína.

Glória Patri et Fílio et Spirítui Sancto,
sicut erat in princípio et nunc et semper
et in sǽcula sæculórum. Amen.   Allelúia.

HYMNUS

Nunc, Sancte, nobis, Spíritus
unum Patri cum Fílio,
dignáre promptus íngeri
nostro refúsus péctori.

Os, lingua, mens, sensus, vigor
confessiónem pérsonent,
flamméscat igne cáritas,
accéndat ardor próximos.

Per te sciámus da Patrem
noscámus atque Fílium,
te utriúsque Spíritum
credámus omni témpore. Amen.


PSALMODIA

Ant. 1 Bonum mihi lex oris tui, Dómine, super mília auri et argénti.

Psalmus 118 (119), 65-72
IX (Teth)

65 Bonitátem fecísti cum servo tuo, Dómine, *
      secúndum verbum tuum.
66 Bonitátem et prudéntiam et sciéntiam doce me, *
      quia præcéptis tuis crédidi. –

67 Priúsquam humiliárer ego errávi; *
      nunc autem elóquium tuum custódiam.
68 Bonus es tu et benefáciens, *
      doce me iustificatiónes tuas. –

69 Excogitavérunt contra me dolósa supérbi, *
      ego autem in toto corde meo servábo mandáta tua.
70 Incrassátum est sicut adeps cor eórum, *
      ego vero in lege tua delectátus sum. –

71 Bonum mihi quia humiliátus sum, *
      ut discam iustificatiónes tuas.
72 Bonum mihi lex oris tui, *
      super mília auri et argénti.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 1 Bonum mihi lex oris tui, Dómine, super mília auri et argénti.

Ant. 2 In Deo sperávi, non timébo quid fáciat mihi homo.

Psalmus 55 (56), 2-7b. 9-14
Fiducia in Domini verbo collocata

Christus in passione monstratur. (S. Hieronymus)

2 Miserére mei, Deus, quóniam conculcávit me homo, *
      tota die impúgnans oppréssit me.
3 Conculcavérunt me inimíci mei tota die, *
      quóniam multi pugnant advérsum me, Altíssime. –

4 In quacúmque die timébo, *
      ego in te sperábo,
5 In Deo, cuius laudábo sermónem, †
      in Deo sperávi; *
      non timébo: quid fáciet mihi caro?
6 Tota die rem meam perturbábant, *
      advérsum me omnes cogitatiónes eórum in malum.
7 Concitábant iúrgia, insidiabántur, *
      ipsi calcáneum meum observábant. –

9 Peregrinatiónes meas tu numerásti: †
       pone lácrimas meas in utre tuo; *
       nonne in supputatióne tua? –

10 Tunc converténtur inimíci mei retrórsum, †
        in quacúmque die invocávero: *
        ecce cognóvi quóniam Deus meus es. –

11 In Deo, cuius laudábo sermónem, *
        in Dómino, cuius laudábo sermónem,
12 in Deo sperávi; *
        non timébo: quid fáciet mihi homo? –

13 Super me sunt, Deus, vota tua; *
        reddam laudatiónes tibi,
14 quóniam eripuísti ánimam meam de morte †
        et pedes meos de lapsu, *
        ut ámbulem coram Deo in lúmine vivéntium.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 2 In Deo sperávi, non timébo quid fáciat mihi homo.

Ant. 3 Magnificáta est usque ad cælos misericórdia tua, Dómine.

Psalmus 56 (57)
In afflictione oratio matutina

Passionem Domini cantat iste psalmus. (S. Augustinus)

2 Miserére mei, Deus, miserére mei, *
      quóniam in te cónfugit ánima mea;
   et in umbra alárum tuárum confúgiam, *
      donec tránseant insídiæ.
3 Clamábo ad Deum Altíssimum, *
      Deum, qui benefécit mihi. –

4 Mittet de cælo et liberábit me; †
      dabit in oppróbrium conculcántes me. *
      Mittet Deus misericórdiam suam et veritátem suam.
5 ánima mea recúmbit in médio catulórum leónum *
      devorántium fílios hóminum.
   Dentes eórum arma et sagíttæ *
      et lingua eórum gládius acútus. –

6 Exaltáre super cælos, Deus, *
      super omnem terram glória tua. –

7 Láqueum paravérunt pédibus meis, *
      et incurvávit se ánima mea;
   fodérunt ante fáciem meam fóveam, *
      et ipsi incidérunt in eam. –

8 Parátum cor meum, Deus, †
      parátum cor meum; *
      cantábo et psalmum dicam.
9 Exsúrge, glória mea, †
       exsúrge, psaltérium et cíthara, *
       excitábo auróram.
10 Confitébor tibi in pópulis, Dómine, *
       et psalmum dicam tibi in natiónibus,
11 quóniam magnificáta est usque ad cælos misericórdia tua *
       et usque ad nubes véritas tua. –

12 Exaltáre super cælos, Deus, *
       super omnem terram glória tua.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 3 Magnificáta est usque ad cælos misericórdia tua, Dómine.

LECTIO BREVIS

2 Cor 5, 19b-20
Pósuit in nobis Deus verbum reconciliatiónis. Pro Christo ergo legatióne fúngimur tamquam Deo exhortánte per nos: obsecrámus pro Christo, reconciliámini Deo.

V. In omnem terram exívit sonus eórum.
R. Et in fines orbis terræ verba eórum.

ORATIO

Orémus:

Deus, qui nos per beátos Apóstolos ad agnitiónem tui nóminis veníre tribuísti, intercedéntibus sanctis Simóne et Iuda, concéde propítius, ut semper augeátur Ecclésia increméntis in te credéntium populórum. Per Christum Dóminum nostrum.

    Deinde, saltem in celebratione communi, additur acclamatio:

Benedicámus Dómino.
R. Deo grátias.

Breviarium Romanum

textus in versione electronica © 2000-2023 Ing. Karel Mracek Dr.h.c. (fr. Pavel, diaconus, CZ)