BREVIARIUM ROMANUM

9 augustus 2023
S. Teresiæ Benedictæ a cruce, virginis et martyris

V. Deus, in adiutórium meum inténde.
R. Dómine, ad adiuvándum me festína.

Glória Patri et Fílio et Spirítui Sancto,
sicut erat in princípio et nunc et semper
et in sǽcula sæculórum. Amen.   Allelúia.

HYMNUS

Nunc, Sancte, nobis, Spíritus
unum Patri cum Fílio,
dignáre promptus íngeri
nostro refúsus péctori.

Os, lingua, mens, sensus, vigor
confessiónem pérsonent,
flamméscat igne cáritas,
accéndat ardor próximos.

Per te sciámus da Patrem
noscámus atque Fílium,
te utriúsque Spíritum
credámus omni témpore. Amen.

PSALMODIA

Ant. 1 Cogitávi vias meas et convérti pedes meos in testimónia tua.

⁵⁷ Pórtio mea Dóminus: *
      dixi custodíre verba tua.
⁵⁸ Deprecátus sum fáciem tuam in toto corde meo; *
      miserére mei secúndum elóquium tuum. –

⁵⁹ Cogitávi vias meas *
      et convérti pedes meos in testimónia tua.
⁶⁰ Festinávi et non sum morátus, *
      ut custódiam præcépta tua. –

⁶¹ Funes peccatórum circumpléxi sunt me, *
      et legem tuam non sum oblítus.
⁶² Média nocte surgébam ad confiténdum tibi *
      super iudícia iustítiæ tuæ.

⁶³ Párticeps ego sum ómnium timéntium te *
      et custodiéntium mandáta tua.
⁶⁴ Misericórdia tua, Dómine, plena est terra; *
      iustificatiónes tuas doce me.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 1 Cogitávi vias meas et convérti pedes meos in testimónia tua.

Ant. 2 Timor et tremor venérunt super me; inténde mihi et exáudi me, Dómine.

Cœpit Iesus pavere et tædere. (Mc 14, 33)

² Auribus pércipe, Deus, oratiónem meam †
      et ne abscondáris a deprecatióne mea; *
³     inténde mihi et exáudi me.
  Excússus sum in meditatióne mea et conturbátus sum *
⁴     a voce inimíci et a tribulatióne peccatóris. –

  Quóniam devolvérunt in me iniquitátem *
      et in ira molésti erant mihi.
⁵ Cor meum torquétur intra me, *
      et formído mortis cécidit super me.
⁶ Timor et tremor venérunt super me, *
      et contéxit me pavor. –

⁷ Et dixi: "Quis dabit mihi pennas sicut colúmbæ, *
      et volábo et requiéscam?
⁸ Ecce elongábo fúgiens *
      et manébo in solitúdine.
⁹ Exspectábo eum, qui salvum me fáciat *
      a spíritu procéllæ et tempestáte." –

¹⁰ Díssipa, Dómine, dívide linguas eórum, *
       quóniam vidi violéntiam et contentiónem in civitáte.
¹¹ Die ac nocte circúmeunt eam super muros eius, †
¹²    iníquitas et labor et insídiæ in médio eius; *
       et non defécit de platéis eius frauduléntia et dolus. –

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 2 Timor et tremor venérunt super me; inténde mihi et exáudi me, Dómine.

Ant. 3 Ad Deum clamábo, et Dóminus salvábit me.

¹³ Quóniam si inimícus meus maledixísset mihi, *
       sustinuíssem útique;
    et si is, qui óderat me, super me magnificátus fuísset, *
       abscondíssem me fórsitan ab eo.
¹⁴ Tu vero, homo coæquális meus, *
       familiáris meus et notus meus,
¹⁵ qui simul habúimus dulce consórtium: *
       in domo Dei ambulávimus in concúrsu. –

¹⁷ Ego autem ad Deum clamábo, *
       et Dóminus salvábit me.
¹⁸ Véspere et mane et merídie meditábor et ingemíscam, *
       et exáudiet vocem meam.
¹⁹ Rédimet in pace ánimam meam ab his, qui impúgnant me, *
       quóniam in multis sunt advérsum me.
²⁰ Exáudiet Deus et humiliábit illos, *
       qui est ante sǽcula. –

    Non enim est illis commutátio, *
       et non timuérunt Deum.
²¹ Exténdit manum suam in sócios; *
       contaminávit fœdus suum.
²² Lene super butýrum est os eius, *
       pugna autem cor illíus:
    mollíti sunt sermónes eius super óleum, *
       et ipsi sunt gládii destrícti. –

²³ Iacta super Dóminum curam tuam, †
       et ipse te enútriet; *
       non dabit in ætérnum fluctuatiónem iusto. –

²⁴ Tu vero, Deus, dedúces eos *
       in púteum intéritus.
    Viri sánguinum et dolósi non dimidiábunt dies suos; *
       ego autem sperábo in te, Dómine.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 3 Ad Deum clamábo, et Dóminus salvábit me.

LECTIO BREVIS

ORATIO

Orémus:

Deus patrum nostrórum, qui beátam Terésiam Benedíctam mártyrem ad cognitiónem Fílii tui crucifíxi eiúsque imitatiónem usque ad mortem perduxísti, ipsa intercedénte concéde, ut omnes hómines Christum Salvatórem agnóscant et per eum ad perpétuam tui visiónem advéniant. Qui vivit et regnat in sǽcula sæculórum.

    Deinde, saltem in celebratione communi, additur acclamatio:

Benedicámus Dómino.
R. Deo grátias.

Breviarium Romanum

textus in versione electronica © 2000-2023 Ing. Karel Mracek Dr.h.c. (fr. Pavel, diaconus, CZ)