☼ lat ☰

BREVIARIUM ROMANUM

13 september 2024
S. Ioannis Chrysostomi, episcopi et Ecclesiæ doctoris


Antiochiæ natus est circa annum 349; optime educatus, vitam asceticam cœpit, et sacerdotio initiatus, magno cum fructu munere prædicationis functus est. Episcopus Constantinopolitanus anno 397 electus, optimum se præbuit pastorem, mores cleri et fidelium ad amussim redigere satagens. Odio aulæ imperialis et invidorum obrutus, semel et bis exsulare coactus est; ærumnis confectus, mortuus est apud Comanam in Ponto, die 14 septembris anni 407. Multa dixit et scripsit ad doctrinam catholicam explicandam et vitam christianam recte informandam, ita ut nomine Chrysostomi appellari meruerit.

AD TERTIAM

V. Deus, in adiutórium meum inténde.
R. Dómine, ad adiuvándum me festína.

Glória Patri et Fílio et Spirítui Sancto,
sicut erat in princípio et nunc et semper
et in sǽcula sæculórum. Amen.   Allelúia.

HYMNUS

Certum tenéntes órdinem,
pio poscámus péctore
hora diéi tértia
trinæ virtútis glóriam,

Ut simus habitáculum
illi Sancto Spirítui,
qui quondam in apóstolis
hac hora distribútus est.

Hoc gradiénte órdine,
ornávit cuncta spléndide
regni cæléstis cónditor
ad nostra ætérna prǽmia.

Deo Patri sit glória
eiúsque soli Fílio
cum Spíritu Paráclito,
in sempitérna sǽcula. Amen.

PSALMODIA

Ant. 1 Vídimus eum despéctum, virum dolórum, et sciéntem infirmitátem.

Psalmus 21 (22)
Afflictio iusti et exauditio

Clamavit Iesus voce magna: „Eli, Eli, lema sabacthani?“ (Mt 27, 46)

I

2 Deus, Deus meus, quare me dereliquísti? *
      Longe a salúte mea verba rugítus mei.
3 Deus meus, clamo per diem, et non exáudis, *
      et nocte, et non est réquies mihi. –

4 Tu autem sanctus es, *
      qui hábitas in láudibus Israel.
5 In te speravérunt patres nostri, *
      speravérunt et liberásti eos;
6 ad te clamavérunt et salvi facti sunt, *
      in te speravérunt et non sunt confúsi. –

7 Ego autem sum vermis et non homo, *
      oppróbrium hóminum et abiéctio plebis.
8 Omnes vidéntes me derisérunt me; *
      torquéntes lábia movérunt caput:
9 "Sperávit in Dómino: erípiat eum, *
      salvum fáciat eum, quóniam vult eum." –

10 Quóniam tu es qui extraxísti me de ventre, *
      spes mea ad úbera matris meæ.
11 In te proiéctus sum ex útero, *
      de ventre matris meæ Deus meus es tu.
12 Ne longe fias a me, †
      quóniam tribulátio próxima est, *
      quóniam non est qui ádiuvet.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 1 Vídimus eum despéctum, virum dolórum, et sciéntem infirmitátem.

Ant. 2 Dividéntes vestiménta Iesu, misérunt sortem.

II

13 Circumdedérunt me vítuli multi, *
      tauri Basan obsedérunt me.
14 Aperuérunt super me os suum *
      sicut leo rápiens et rúgiens.
15 Sicut aqua effúsus sum, *
      et dissolúta sunt ómnia ossa mea.
    Factum est cor meum tamquam cera *
      liquéscens in médio ventris mei.
16 Aruit tamquam testa palátum meum, †
      et lingua mea adhǽsit fáucibus meis, *
      et in púlverem mortis deduxísti me. –

17 Quóniam circumdedérunt me canes multi, *
      concílium malignántium obsédit me.
18 Fodérunt manus meas et pedes meos, *
      et dinumerávi ómnia ossa mea.
19 Ipsi vero consideravérunt et inspexérunt me; †
      divisérunt sibi vestiménta mea *
      et super vestem meam misérunt sortem. –

20 Tu autem, Dómine, ne elongáveris, *
      fortitúdo mea, ad adiuvándum me festína.
21 Erue a frámea ánimam meam *
      et de manu canis únicam meam.
22 Salva me ex ore leónis *
      et a córnibus unicórnium humilitátem meam.
23 Narrábo nomen tuum frátribus meis, *
      in médio ecclésiæ laudábo te.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 2 Dividéntes vestiménta Iesu, misérunt sortem.

Ant. 3 Adorábunt in conspéctu Dómini univérsæ famíliæ géntium.

III

24 Qui timétis Dóminum, laudáte eum, *
      univérsum semen Iacob, glorificáte eum.
25 Métuat eum omne semen Israel, *
      quóniam non sprevit neque despéxit afflictiónem páuperis,
    nec avértit fáciem suam ab eo *
      et, cum clamáret ad eum, exaudívit. –

26 Apud te laus mea in ecclésia magna; *
      vota mea reddam in conspéctu timéntium eum.
27 Edent páuperes et saturabúntur, †
      et laudábunt Dóminum, qui requírunt eum: *
      "Vivant corda eórum in sǽculum sǽculi!"
28 Reminiscéntur et converténtur ad Dóminum univérsi fines terræ, *
      et adorábunt in conspéctu eius univérsæ famíliæ géntium. –

29 Quóniam Dómini est regnum, *
      et ipse dominábitur géntium.
30 Ipsum solum adorábunt omnes, qui dórmiunt in terra; *
      in conspéctu eius prócident omnes, qui descéndunt in púlverem. –

31 ánima autem mea illi vivet, *
      et semen meum sérviet ipsi.
32 Narrábitur de Dómino generatióni ventúræ, †
      et annuntiábunt iustítiam eius pópulo, qui nascétur: *
      "Hæc fecit Dóminus!"

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 3 Adorábunt in conspéctu Dómini univérsæ famíliæ géntium.

LECTIO BREVIS

Rom 1, 16b-17
Virtus Dei est in salútem omni credénti. Iustítia enim Dei in eo revelátur ex fide in fidem, sicut scriptum est: Iustus autem ex fide vivet.


V. In Dómino lætábitur cor nostrum.
R. Et in nómine sancto eius sperávimus.

ORATIO

Orémus:

Dómine Iesu Christe, qui hora tértia ad crucis pœnam ductus es pro mundi salúte, te súpplices exorámus, ut et de prætéritis malis semper apud te véniam impetrémus, et de futúris iúgiter habeámus custódiam. Qui vivis et regnas in sǽcula sæculórum.

    Deinde, saltem in celebratione communi, additur acclamatio:

Benedicámus Dómino.
R. Deo grátias.

Breviarium Romanum

textus in versione electronica © 2000-2023 Ing. Karel Mracek Dr.h.c. (fr. Pavel, diaconus, CZ)