☼ lat ☰

BREVIARIUM ROMANUM

7 februarius 2027
Pro O.P.: Anniversarium patrum et matrum defunctorum


Communi hac celebratione memoriam agimus parentum nostrorum qui nos præcesserunt cum signo fidei et dormiunt in somno pacis. Ita Familia nostra Dominicana pietatem erga parentes nostros exprimit in unum coniungens, sicut in vita et in morte, illos qui nos in Christo genuerunt quique nos persæpe ad sequelam Christi præcoluerunt atque obtulerunt.

AD TERTIAM

V. Deus, in adiutórium meum inténde.
R. Dómine, ad adiuvándum me festína.

Glória Patri et Fílio et Spirítui Sancto,
sicut erat in princípio et nunc et semper
et in sǽcula sæculórum. Amen.   Allelúia.

HYMNUS

Qui lacrimátus Lázarum
geménsque cum soróribus,
ipsum fecísti prǽpotens
illárum reddi stúdiis:

Qui petivísti sóntibus
benígnus indulgéntiam,
ac verba miserántia
dixísti pœnæ sócio:

Qui, móriens, discípulo
matrem donásti Vírginem,
tuórum quæ fidélium
agóni adésset último:

Da nobis, Christe Dómine,
tuo redémptis sánguine,
duræ mortis tristítiam
in vitæ verti gáudium.

Pro uno defuncto:
Tuúmque voca fámulum,
ex hoc proféctum sǽculo,
ut ubi mors iam déerit
te vitæ canat príncipem. Amen.

Pro una defuncta:
Tuámque voca fámulam,
ex hoc proféctam sǽculo,
ut ubi mors iam déerit
te vitæ canat príncipem. Amen.

Pro pluribus:
Tuósque voca fámulos,
ex hoc proféctos sǽculo,
ut ubi mors iam déerit
te vitæ canant príncipem. Amen.

PSALMODIA

Ant. 1 Bonum est confúgere ad Dóminum; in sǽculum misericórdia eius, allelúia.

Psalmus 117 (118)
Vox iubilationis et salutis

Hic est lapis, qui reprobatus est a vobis ædificatoribus, qui factus est in caput anguli. (Act 4, 11)

I

1 Confitémini Dómino, quóniam bonus, *
      quóniam in sǽculum misericórdia eius. –

2 Dicat nunc Israel, quóniam bonus, *
      quóniam in sǽculum misericórdia eius.
3 Dicat nunc domus Aaron, *
      quóniam in sǽculum misericórdia eius.
4 Dicant nunc, qui timent Dóminum, *
      quóniam in sǽculum misericórdia eius. –

5 De tribulatióne invocávi Dóminum, *
      et exaudívit me edúcens in latitúdinem Dóminus.
6 Dóminus mecum, *
      non timébo, quid fáciat mihi homo.
7 Dóminus mecum adiútor meus, *
      et ego despíciam inimícos meos. –

8 Bonum est confúgere ad Dóminum *
      quam confídere in hómine.
9 Bonum est confúgere ad Dóminum *
      quam confídere in princípibus.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 1 Bonum est confúgere ad Dóminum; in sǽculum misericórdia eius, allelúia.

Ant. 2 Fortitúdo mea et laus mea Dóminus, allelúia.

II

10 Omnes gentes circuiérunt me, *
       et in nómine Dómini excídi eos.
11 Circumdántes circumdedérunt me, *
       et in nómine Dómini excídi eos.
12 Circumdedérunt me sicut apes †
       et exarsérunt sicut ignis in spinis, *
       et in nómine Dómini excídi eos.
13 Impelléntes impulérunt me, ut cáderem, *
       et Dóminus adiúvit me.
14 Fortitúdo mea et laus mea Dóminus, *
       et factus est mihi in salútem. –

15 Vox iubilatiónis et salútis *
       in tabernáculis iustórum:
16 "Déxtera Dómini fecit virtútem! †
       Déxtera Dómini exaltávit me; *
       déxtera Dómini fecit virtútem!" –

17 Non móriar, sed vivam *
       et narrábo ópera Dómini.
18 Castígans castigávit me Dóminus *
       et morti non trádidit me.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 2 Fortitúdo mea et laus mea Dóminus, allelúia.

Ant. 3 Confitébor tibi, Dómine, quóniam exaudísti me, allelúia.

III

19 Aperíte mihi portas iustítiæ, *
       ingréssus in eas confitébor Dómino. –

20 Hæc porta Dómini; *
       iusti intrábunt in eam. –

21 Confitébor tibi, quóniam exaudísti me *
       et factus es mihi in salútem. –

22 Lápidem, quem reprobavérunt ædificántes, *
       hic factus est in caput ánguli;
23 a Dómino factum est istud *
       et est mirábile in óculis nostris.
24 Hæc est dies, quam fecit Dóminus: *
       exsultémus et lætémur in ea. –

25 O Dómine, salvum me fac; *
       o Dómine, da prosperitátem! –

26 Benedíctus, qui venit in nómine Dómini. *
       Benedícimus vobis de domo Dómini. –

27 Deus Dóminus et illúxit nobis. *
       Instrúite sollemnitátem in ramis condénsis usque ad córnua altáris. –

28 Deus meus es tu, et confitébor tibi, *
       Deus meus, et exaltábo te. –

29 Confitémini Dómino, quóniam bonus, *
       quóniam in sǽculum misericórdia eius.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 3 Confitébor tibi, Dómine, quóniam exaudísti me, allelúia.

LECTIO BREVIS

Iob 19, 25-26
Scio quod redémptor meus vivit et in novíssimo super púlvere stabit; et post pellem meam hanc, quam abstraxérunt, et de carne mea vidébo Deum.

Vel:

2 Mac 7, 9b
Rex mundi defúnctos nos pro suis légibus in ætérnam vitæ resurrectiónem suscitábit.


V. Quare tristis es, ánima mea, et quare conturbáris in me?
R. Spera in Deo, quóniam adhuc confitébor illi.

ORATIO

Orémus:

Deus, qui nos patrem et matrem honoráre præcepísti, miserére cleménter paréntibus nostris eorúmque peccáta dimítte, nosque eos in ætérnæ claritátis gáudio fac vidére. Per Christum Dóminum nostrum.

    Deinde, saltem in celebratione communi, additur acclamatio:

Benedicámus Dómino.
R. Deo grátias.

Breviarium Romanum

textus in versione electronica © 2000-2023 Ing. Karel Mracek Dr.h.c. (fr. Pavel, diaconus, CZ)