☼ lat ☰

BREVIARIUM ROMANUM

3 iulius 2013
S. Thomæ, apostoli


Thomas inter Apostolos agnoscitur præcipue ob eius incredulitatem, quæ evanuit coram Christo resuscitato; et sic fidem paschalem Ecclesiæ proclamavit: «Dominus meus et Deus meus!». Nihil certi scitur de eius vita, præter indicia quæ in Evangelio habentur. Apostolus Indicos populos evangelizasse fertur. A sǽculo VI celebratio translationis eius corporis die 3 iulii Edessæ memoratur.

AD NONAM

V. Deus, in adiutórium meum inténde.
R. Dómine, ad adiuvándum me festína.

Glória Patri et Fílio et Spirítui Sancto,
sicut erat in princípio et nunc et semper
et in sǽcula sæculórum. Amen.   Allelúia.

HYMNUS

Ternis horárum términis
volútis, dante Dómino,
trinum perfécte et únicum
ipsum devóti psállimus.

Sacrum Dei mystérium
puro tenéntes péctore,
Petri magístri régula
signo salútis pródita,

Et nos psallámus spíritu,
hæréntes sic apóstolis,
ut plantas adhuc débiles
Christi virtúte dírigant.

Deo Patri sit glória
eiúsque soli Fílio
cum Spíritu Paráclito,
in sempitérna sǽcula. Amen.

PSALMODIA

Ant. 1 Benedíctus es, Dómine; doce me iustificatiónes tuas.

Psalmus 118 (119), 9-16
II (Beth)

9 In quo mundábit adulescéntior viam suam? *
      In custodiéndo sermónes tuos.
10 In toto corde meo exquisívi te, *
      ne erráre me fácias a præcéptis tuis. –

11 In corde meo abscóndi elóquia tua, *
      ut non peccem tibi.
12 Benedíctus es, Dómine; *
      doce me iustificatiónes tuas. –

13 In lábiis meis *
      numerávi ómnia iudícia oris tui.
14 In via testimoniórum tuórum delectátus sum *
      sicut in ómnibus divítiis. –

15 In mandátis tuis exercébor *
      et considerábo vias tuas.
16 In iustificatiónibus tuis delectábor, *
      non oblivíscar sermónem tuum.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 1 Benedíctus es, Dómine; doce me iustificatiónes tuas.

Ant. 2 Rétine gressus meos in sémitis tuis, Dómine.

Psalmus 16 (17)
Ab impiis salva me, Domine

In diebus carnis suæ ... preces offerens et exauditus. (Hebr 5, 7)

I

1 Exáudi, Dómine, iustítiam meam, *
      inténde deprecatiónem meam.
   Auribus pércipe oratiónem meam, *
      non in lábiis dolósis.
2 De vultu tuo iudícium meum pródeat; *
      óculi tui vídeant æquitátes. –

3 Proba cor meum et vísita nocte; †
      igne me exámina, *
      et non invénies in me iniquitátem.
4 Non transgréditur os meum ad ópera hóminum, *
      propter verba labiórum tuórum custodívi me a viis violénti.
5 Rétine gressus meos in sémitis tuis, *
      ut non moveántur vestígia mea. –

6 Ego ad te clamávi, quóniam exáudis me, Deus; *
      inclína aurem tuam mihi et exáudi verba mea.
7 Mirífica misericórdias tuas, *
      qui salvos facis ab insurgéntibus sperántes in déxtera tua.
8 Custódi me ut pupíllam óculi, †
      sub umbra alárum tuárum prótege me *
9    a fácie impiórum, qui me afflixérunt.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 2 Rétine gressus meos in sémitis tuis, Dómine.

Ant. 3 Exsúrge, Dómine, éripe ánimam meam.

II

    Inimíci mei in furóre circumdedérunt me, †
10    ádipem suum conclusérunt; *
       os eórum locútum est supérbiam.
11 Incedéntes nunc circumdedérunt me, *
       óculos suos statuérunt prostérnere in terram.
12 Aspéctus eórum quasi leónis paráti ad prædam *
       et sicut cátuli leónis recubántis in ábditis. –

13 Exsúrge, Dómine, prǽveni eum, supplánta eum; *
       éripe ánimam meam ab ímpio frámea tua,
14 a mórtuis manu tua, Dómine, *
       a mórtuis, quorum defécit pórtio vitæ.
    De recónditis tuis adímpleas ventrem eórum, *
       saturéntur fílii et dimíttant relíquias párvulis suis.
15 Ego autem in iustítia vidébo fáciem tuam, *
       satiábor, cum evigilávero, conspéctu tuo.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 3 Exsúrge, Dómine, éripe ánimam meam.

LECTIO BREVIS

Act 5, 41-42
Ibant apóstoli gaudéntes a conspéctu concílii quóniam digni hábiti sunt pro nómine contuméliam pati; et omni die in templo et circa domos non cessábant docéntes et evangelizántes Christum, Iesum.

V. Gaudéte et exsultáte, dicit Dóminus.
R. Quia nómina vestra scripta sunt in cælis.

ORATIO

Orémus:

Da nobis, omnípotens Deus, beáti Thomæ apóstoli festivitáte gloriári, ut eius semper et patrocíniis sublevémur, et vitam credéntes habeámus in nómine eius, quem ipse Dóminum agnóvit, Iesum Christum Fílium tuum. Qui vivit et regnat in sǽcula sæculórum.

    Deinde, saltem in celebratione communi, additur acclamatio:

Benedicámus Dómino.
R. Deo grátias.

Breviarium Romanum

textus in versione electronica © 2000-2023 Ing. Karel Mracek Dr.h.c. (fr. Pavel, diaconus, CZ)