BREVIARIUM ROMANUM

20 november 2010
D. N. Iesu Christi Universorum Regis

V. Deus, in adiutórium meum inténde.
R. Dómine, ad adiuvándum me festína.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen. Allelúia.

    Postea laudabiliter fit conscientiæ discussio, quæ in celebratione communi inseri potest in actum pænitentialem, iuxta formulas in Missa adhibitas.

HYMNUS

Christe, qui, splendor et dies,
noctis tenébras détegis,
lucísque lumen créderis,
lumen beátis prǽdicans,

Precámur, sancte Dómine,
hac nocte nos custódias;
sit nobis in te réquies,
quiétas horas tríbue.

Somno si dantur óculi,
cor semper ad te vígilet;
tuáque dextra prótegas
fidéles, qui te díligunt.

Defénsor noster, áspice,
insidiántes réprime,
gubérna tuos fámulos,
quos sánguine mercátus es.

Sit, Christe, rex piíssime,
tibi Patríque glória,
cum Spíritu Paráclito,
in sempitérna sǽcula. Amen.

PSALMODIA

Ant. 1 Miserére mei, Dómine, et exáudi oratiónem meam.

Admirabilem fecit Dominus, quem suscitavit a mórtuis. (S. Augustinus)

² Cum invocárem, exaudívit me Deus iustítiæ meæ. *
      In tribulatióne dilatásti mihi;
   miserére mei *
      et exáudi oratiónem meam. –

³ Fílii hóminum, úsquequo gravi corde? *
      Ut quid dilígitis vanitátem et quǽritis mendácium?
⁴ Et scitóte quóniam mirificávit Dóminus sanctum suum; *
      Dóminus exáudiet, cum clamávero ad eum. –

⁵ Irascímini et nolíte peccáre; *
      loquímini in córdibus vestris, in cubílibus vestris et conquiéscite.
⁶ Sacrificáte sacrifícium iustítiæ *
      et speráte in Dómino. –

⁷ Multi dicunt: „Quis osténdit nobis bona?“ *
      Leva in signum super nos lumen vultus tui, Dómine!
⁸ Maiórem dedísti lætítiam in corde meo, *
      quam cum multiplicántur fruméntum et vinum eórum.
⁹ In pace in idípsum dórmiam et requiéscam, *
      quóniam tu, Dómine, singuláriter in spe constituísti me.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 1 Miserére mei, Dómine, et exáudi oratiónem meam.

Ant. 2 In nóctibus benedícite Dóminum.

Laudem dicite Deo nostro, omnes servi eius et qui timetis eum, pusilli et magni! (Ap 19, 5)

¹ Ecce benedícite Dóminum, omnes servi Dómini, *
      qui statis in domo Dómini per noctes.
² Extóllite manus vestras ad sanctuárium *
      et benedícite Dóminum. –

³ Benedícat te Dóminus ex Sion, *
      qui fecit cælum et terram.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 2 In nóctibus benedícite Dóminum.

LECTIO BREVIS

RESPONSORIUM BREVE

V. In manus tuas, Dómine, * comméndo spíritum meum.
R. In manus tuas, Dómine, * comméndo spíritum meum.
V. Redemísti nos, Dómine Deus veritátis.
R. Comméndo spíritum meum.
V. Glória Patri et Fílio * et Spirítui Sancto.
R. In manus tuas, Dómine, * comméndo spíritum meum.

CANTICUM EVANGELICUM

Ant. Salva nos, Dómine, vigilántes, custódi nos dormiéntes, ut vigilémus cum Christo et requiescámus in pace. (T.P. Allelúia.)

²⁹ Nunc dimíttis servum tuum, Dómine, *
      secúndum verbum tuum in pace,
³⁰ quia vidérunt óculi mei *
      salutáre tuum,
³¹ quod parásti *
      ante fáciem ómnium populórum,
³² lumen ad revelatiónem géntium *
      et glóriam plebis tuæ Israel.

Glória Patri et Fílio, *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. Salva nos, Dómine, vigilántes, custódi nos dormiéntes, ut vigilémus cum Christo et requiescámus in pace. (T.P. Allelúia.)

ORATIO CONCLUSIVA

Orémus:

Vísita nos, quǽsumus, Dómine, hac nocte præsénti, ut, dilúculo tua virtúte surgéntes, de resurrectióne Christi tui gaudére valeámus. Qui vivit et regnat in sǽcula sæculórum. Amen.

Noctem quiétam et finem perféctum concédat nobis Dóminus omnípotens.
R. Amen.

    Deinde dicitur una ex sequentibus antiphonis finalibus ad B. Mariam Virginem.
    vel Antiphonæ dominicanæ traditionales.

Breviarium Romanum

textus in versione electronica © 2000-2023 Ing. Karel Mracek Dr.h.c. (fr. Pavel, diaconus, CZ)