BREVIARIUM ROMANUM

20 aprilis 2016
Pro O.P.: S. Agnetis de Montepulciano, virginis, memoria

V. Deus, in adiutórium meum inténde.
R. Dómine, ad adiuvándum me festína.

Glória Patri et Fílio et Spirítui Sancto,
sicut erat in princípio et nunc et semper
et in sǽcula sæculórum. Amen.  Allelúia.

HYMNUS

Magnæ dies lætítiæ:
venérunt Agni núptiæ,
et Agnes Agnum séquitur,
Sponsóque sponsa iúngitur.

Vox Angelórum cóncinit,
lætánte cætu súscipit
virgo beáta vírginem,
cæléstis Agni cómitem.

Signis corúscat váriis,
miris micat prodígiis,
confert salútem lánguidis,
vitámque reddit mórtuis.

Sit, Christe Rex piíssime,
tibi Patríque glória,
cum Spíritu Paráclito
in sempitérna sǽcula. Amen.

PSALMODIA

Ant. 1 Ad te de luce vígilo, Deus, ut vídeam virtútem tuam, allelúia.

Quis cognovit sensum Domini? Aut quis consiliarius eius fuit? (Rom 11, 34)

¹ Dómine, scrutátus es et cognovísti me, *
²     tu cognovísti sessiónem meam et resurrectiónem meam.
   Intellexísti cogitatiónes meas de longe, *
³     sémitam meam et accúbitum meum investigásti.
   Et omnes vias meas perspexísti, †
⁴     quia nondum est sermo in lingua mea, *
      et ecce, Dómine, tu novísti ómnia. –

⁵ A tergo et a fronte coartásti me *
      et posuísti super me manum tuam.
⁶ Mirábilis nimis facta est sciéntia tua super me, *
      sublímis, et non attíngam eam. –

⁷ Quo ibo a spíritu tuo *
      et quo a fácie tua fúgiam?
⁸ Si ascéndero in cælum, tu illic es; *
      si descéndero in inférnum, ades.
⁹ Si súmpsero pennas auróræ *
       et habitávero in extrémis maris,
¹⁰ étiam illuc manus tua dedúcet me, *
       et tenébit me déxtera tua.
¹¹ Si díxero: „Fórsitan ténebræ cómpriment me, *
       et non illuminátio erit circa me,“
¹² étiam ténebræ non obscurabúntur a te, †
       et nox sicut dies illuminábitur *
       — sicut ténebræ eius ita et lumen eius —.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 1 Ad te de luce vígilo, Deus, ut vídeam virtútem tuam, allelúia.

Ant. 2 Iam hiems tránsiit, imber ábiit et recéssit: surge, amíca mea, et veni, allelúia.

¹³ Quia tu formásti renes meos, *
       contexuísti me in útero matris meæ.
¹⁴ Confitébor tibi, quia mirabíliter plasmátus sum; †
       mirabília ópera tua, *
       et ánima mea cognóscit nimis. –

¹⁵ Non sunt abscóndita ossa mea a te, †
       cum factus sum in occúlto, *
       contéxtus in inferióribus terræ.
¹⁶ Imperféctum adhuc me vidérunt óculi tui, †
       et in libro tuo scripti erant omnes dies: *
       ficti erant, et nondum erat unus ex eis.
¹⁷ Mihi autem nimis pretiósæ cogitatiónes tuæ, Deus; *
       nimis gravis summa eárum.
¹⁸ Si dinumerábo eas, super arénam multiplicabúntur; *
       si ad finem pervénerim, adhuc sum tecum. –

     ¹⁹  [Utinam occidas, Deus, peccatores; *
          viri sanguinum, declinate a me.
     ²⁰  Qui loquuntur contra te maligne: *
          exaltantur in vanum contra te.
     ²¹  Nonne, qui oderunt te, Domine, oderam *
          et insurgentes in te abhorrebam?
     ²²  Perfecto odio oderam illos, *
          et inimici facti sunt mihi.]

²³ Scrutáre me, Deus, et scito cor meum; *
       proba me et cognósce sémitas meas
²⁴ et vide, si via vanitátis in me est, *
       et deduc me in via ætérna.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 2 Iam hiems tránsiit, imber ábiit et recéssit: surge, amíca mea, et veni, allelúia.

Ant. 3 Me étenim de die in diem quærunt, et scire vias meas volunt, allelúia.

¹² Grátias agámus Deo Patri, *
       qui idóneos nos fecit in partem sortis sanctórum in lúmine,
¹³ qui erípuit nos de potestáte tenebrárum*
       et tránstulit in regnum Fílii dilectiónis suæ,
¹⁴ in quo habémus redemptiónem, *
       remissiónem peccatórum; –

¹⁵ qui est imágo Dei invisíbilis, *
       primogénitus omnis creatúræ,
¹⁶ quia in ipso cóndita sunt univérsa †
       in cælis et in terra, *
       visibília et invisibília,
    sive throni sive dominatiónes *
       sive principátus sive potestátes. –

    Omnia per ipsum et in ipsum creáta sunt, †
¹⁷    et ipse est ante ómnia, *
       et ómnia in ipso constant. –

¹⁸ Et ipse est caput córporis ecclésiæ; †
       qui est princípium, primogénitus ex mórtuis, *
       ut sit in ómnibus ipse primátum tenens,
¹⁹ quia in ipso complácuit omnem plenitúdinem habitáre *
       et per eum reconciliáre ómnia in ipsum,
²⁰ pacíficans per sánguinem crucis eius, *
       sive quæ in terris sive quæ in cælis sunt.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 3 Me étenim de die in diem quærunt, et scire vias meas volunt, allelúia.
 

LECTIO BREVIS

RESPONSORIUM BREVE
V. Tibi dixit cor meum: Quæsívi vultum tuum, * allelúia, allelúia.
R. Tibi dixit cor meum: Quæsívi vultum tuum, * allelúia, allelúia.
V. Vultum tuum, Dómine, requíram,
R. allelúia, allelúia.
V. Glória Patri et Fílio * et Spirítui Sancto.
R. Tibi dixit cor meum: Quæsívi vultum tuum, * allelúia, allelúia.

 

MAGNIFICAT

Ad Magnificat, ant. Venérunt núptiæ Agni, et uxor eius præparávit se: Beáti qui ad cenam Agni vocáti sunt, allelúia.

Vel, praesertim in cantu: Conscéndit Agnes hódie cæléstis regni sólium: stolam indúta glóriæ intrat in Sponsi thálamum, allelúia.

⁴⁶ Magníficat *
     ánima mea Dóminum,
⁴⁷ et exsultávit spíritus meus *
      in Deo salvatóre meo,
⁴⁸ quia respéxit humilitátem ancíllæ suæ. *
      Ecce enim ex hoc beátam me dicent omnes generatiónes,
⁴⁹ quia fecit mihi magna, qui potens est, *
      et sanctum nomen eius,
⁵⁰ et misericórdia eius in progénies et progénies *
      timéntibus eum.

⁵¹ Fecit poténtiam in bráchio suo, *
      dispérsit supérbos mente cordis sui;
⁵² depósuit poténtes de sede *
      et exaltávit húmiles;
⁵³ esuriéntes implévit bonis *
      et dívites dimísit inánes.

⁵⁴ Suscépit Israel púerum suum, *
      recordátus misericórdiæ,
⁵⁵ sicut locútus est ad patres nostros, *
      Abraham et sémini eius in sǽcula.

Ad Magnificat, ant. Venérunt núptiæ Agni, et uxor eius præparávit se: Beáti qui ad cenam Agni vocáti sunt, allelúia.

Vel, praesertim in cantu: Conscéndit Agnes hódie cæléstis regni sólium: stolam indúta glóriæ intrat in Sponsi thálamum, allelúia.

PRECES

Deum, qui in Fílio suo, a morte resuscitáto, vitam nobis reserávit ætérnam, implorémus dicéntes:
     Per victóriam Christi salva redémptos tuos.

Deus patrum nostrórum, qui glorificásti Fílium tuum Iesum, súscitans eum a mórtuis, move nos ad pæniténtiam perféctam,
— ut in novitáte vitæ ambulémus.
Tu, qui nos oves errántes ad pastórem et epíscopum animárum nostrárum duxísti,
— sub institutióne pastórum Ecclésiæ nos serva fidéles.
Tu, qui primítias discipulórum Fílii tui ex Iudáico pópulo elegísti,
— fíliis Israel repromissiónem revéla, quæ ad patres eórum facta est.
Meménto ómnium derelictórum, orphanórum, viduárum;
— et, quos Fílius tuus per mortem suam tibi reconciliávit, ne solos relínquas.
Stéphanum, qui conféssus est Iesum stantem a dextris tuis, ad te vocásti:
— súscipe fratres nostros, qui te per fidem et caritátem exspectavérunt.

Pater noster, qui es in cælis,
sanctificétur nomen tuum;
advéniat regnum tuum;
fiat volúntas tua, sicut in cælo et in terra.
Panem nostrum cotidiánum da nobis hódie;
et dimítte nobis débita nostra,
sicut et nos dimíttimus debitóribus nostris;
et ne nos indúcas in tentatiónem;
sed líbera nos a malo.

Pater noster.....

ORATIO
Deus, qui sponsam tuam Agnétem miro decorásti oratiónis ardóre, concéde ut eius imitatióne, tibi méntibus semper inténti, copiósum pietátis fructum exínde cónsequi valeámus. Per Dóminum nostrum Iesum Christum, Fílium tuum, qui tecum vivit et regnat in unitáte Spíritus Sancti, Deus, per ómnia sǽcula sæculórum.

    Deinde, si præest sacerdos vel diaconus, populum dimittit, dicens:

Dóminus vobíscum.
R. Et cum spíritu tuo.
Benedícat vos omnípotens Deus,
Pater, et Fílius, † et Spíritus Sanctus.
R. Amen.

    Vel alia formula benedictionis, sicut in Missa.
    Et, si fit dimissio, sequitur invitatio:

Ite in pace. Allelúia, allelúia.
R. Deo grátias. Allelúia, allelúia.

    Absente sacerdote vel diacono, et in recitatione a solo, sic concluditur:

Dóminus nos benedícat,
et ab omni malo deféndat,
et ad vitam perdúcat ætérnam.
R. Amen.

Breviarium Romanum

textus in versione electronica © 2000-2023 Ing. Karel Mracek Dr.h.c. (fr. Pavel, diaconus, CZ)