BREVIARIUM ROMANUM

14 december 2019
III DOMINICA Adventus

V. Deus, in adiutórium meum inténde.
R. Dómine, ad adiuvándum me festína.

Glória Patri et Fílio et Spirítui Sancto,
sicut erat in princípio et nunc et semper
et in sǽcula sæculórum. Amen.  Allelúia.

HYMNUS

Cónditor alme síderum,
ætérna lux credéntium,
Christe, redémptor ómnium,
exáudi preces súpplicum.

Qui cóndolens intéritu
mortis períre sǽculum,
salvásti mundum lánguidum,
donans reis remédium,

Vergénte mundi véspere,
uti sponsus de thálamo,
egréssus honestíssima
Vírginis matris cláusula.

Cuius forti poténtiæ
genu curvántur ómnia;
cæléstia, terréstria
nutu faténtur súbdita.

Te, Sancte, fide quǽsumus,
ventúre iudex sǽculi,
consérva nos in témpore
hostis a telo pérfidi.

Sit, Christe, rex piíssime,
tibi Patríque glória
cum Spíritu Paráclito,
in sempitérna sǽcula. Amen.

PSALMODIA

Ant. 1 Ierúsalem, gaude gáudio magno, quia véniet tibi Salvátor, allelúia.

Deposuit potentes de sede et exaltavit humiles. (Lc 1, 52)

¹ Laudáte, púeri Dómini, *
      laudáte nomen Dómini.
² Sit nomen Dómini benedíctum *
      ex hoc nunc et usque in sǽculum.
³ A solis ortu usque ad occásum *
      laudábile nomen Dómini. –

⁴ Excélsus super omnes gentes Dóminus, *
      super cælos glória eius.
⁵ Quis sicut Dóminus Deus noster, qui in altis hábitat *
⁶     et se inclínat, ut respíciat in cælum et in terram? -

⁷ Súscitans de terra ínopem, *
      de stércore érigens páuperem,
⁸ ut cóllocet eum cum princípibus, *
      cum princípibus pópuli sui. –

⁹ Qui habitáre facit stérilem in domo, *
      matrem filiórum lætántem.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 1 Ierúsalem, gaude gáudio magno, quia véniet tibi Salvátor, allelúia.

Ant. 2 Ego Dóminus prope feci iustítiam meam; non elongábitur, et salus mea non morábitur.

Per ipsum (Christum) offeramus hóstiam laudis semper Deo. (Hebr 13, 15)

¹⁰ Crédidi, étiam cum locútus sum: *
      „Ego humiliátus sum nimis.“
¹¹ Ego dixi in trepidatióne mea: *
      „Omnis homo mendax.“ –

¹² Quid retríbuam Dómino *
      pro ómnibus, quæ retríbuit mihi?
¹³ Cálicem salutáris accípiam *
      et nomen Dómini invocábo. –

¹⁴ Vota mea Dómino reddam *
      coram omni pópulo eius.
¹⁵ Pretiósa in conspéctu Dómini *
      mors sanctórum eius. –

¹⁶ O Dómine, ego servus tuus, *
      ego servus tuus et fílius ancíllæ tuæ.
    Dirupísti víncula mea: †
¹⁷    tibi sacrificábo hóstiam laudis *
      et nomen Dómini invocábo. –

¹⁸ Vota mea Dómino reddam *
      coram omni pópulo eius,
¹⁹ in átriis domus Dómini, *
      in médio tui, Ierúsalem.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 2 Ego Dóminus prope feci iustítiam meam; non elongábitur, et salus mea non morábitur.

Ant. 3 Emítte Agnum, Dómine, dominatórem terræ, de Petra desérti, ad montem fíliæ Sion.

⁶ Christus Iesus, cum in forma Dei esset, *
      non rapínam arbitrátus est esse se æquálem Deo,
⁷  sed semetípsum exinanívit formam servi accípiens, †
      in similitúdinem hóminum factus; *
      et hábitu invéntus ut homo,
⁸ humiliávit semetípsum †
      factus obœdiens usque ad mortem, *
      mortem autem crucis. –

⁹ Propter quod et Deus illum exaltávit †
      et donávit illi nomen, *
      quod est super omne nomen,
¹⁰ ut in nómine Iesu omne genu flectátur *
       cæléstium et terréstrium et infernórum
    et omnis lingua confiteátur: *
¹¹   «Dóminus Iesus Christus», in glóriam Dei Patris.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 3 Emítte Agnum, Dómine, dominatórem terræ, de Petra desérti, ad montem fíliæ Sion.

LECTIO BREVIS

RESPONSORIUM BREVE
V. Osténde nobis, Dómine, * misericórdiam tuam.
R. Osténde nobis, Dómine, * misericórdiam tuam.
V. Et salutáre tuum da nobis.
R. Misericórdiam tuam.
V. Glória Patri et Fílio * et Spirítui Sancto.
R. Osténde nobis, Dómine, * misericórdiam tuam.

MAGNIFICAT

Ad Magnificat, ant. Ante me non est formátus Deus, et post me non erit: quia mihi curvábitur omne genu, et confitébitur omnis lingua.

⁴⁶ Magníficat *
     ánima mea Dóminum,
⁴⁷ et exsultávit spíritus meus *
      in Deo salvatóre meo,
⁴⁸ quia respéxit humilitátem ancíllæ suæ. *
      Ecce enim ex hoc beátam me dicent omnes generatiónes,
⁴⁹ quia fecit mihi magna, qui potens est, *
      et sanctum nomen eius,
⁵⁰ et misericórdia eius in progénies et progénies *
      timéntibus eum.

⁵¹ Fecit poténtiam in bráchio suo, *
      dispérsit supérbos mente cordis sui;
⁵² depósuit poténtes de sede *
      et exaltávit húmiles;
⁵³ esuriéntes implévit bonis *
      et dívites dimísit inánes.

⁵⁴ Suscépit Israel púerum suum, *
      recordátus misericórdiæ,
⁵⁵ sicut locútus est ad patres nostros, *
      Abraham et sémini eius in sǽcula.

Ad Magnificat, ant. Ante me non est formátus Deus, et post me non erit: quia mihi curvábitur omne genu, et confitébitur omnis lingua.

PRECES
Christum, gáudium et exsultatiónem ómnium eum exspectántium, invocémus, dicéntes:
     Veni, Dómine, et noli tardáre.

Læti exspectámus advéntum tuum,
— veni, Dómine Iesu.
Tu, qui es ante sǽcula,
— veni ad salvándum nos in hoc sǽculo.
Tu, qui creásti mundum et omnes qui hábitant in eo,
— veni ad rediméndum opus mánuum tuárum.
Qui nostram non horruísti mortálem natúram,
— veni ad eripiéndum nos a mortis império.
Qui venísti ut vitam superabundántem haberémus,
— veni nobísque dona tuam vitam ætérnam.
Qui omnes hómines in regnum tuum adunáre voluísti,
— veni ad congregándum eos qui vultus tui visiónem exspéctant.

Pater noster, qui es in cælis,
sanctificétur nomen tuum;
advéniat regnum tuum;
fiat volúntas tua, sicut in cælo et in terra.
Panem nostrum cotidiánum da nobis hódie;
et dimítte nobis débita nostra,
sicut et nos dimíttimus debitóribus nostris;
et ne nos indúcas in tentatiónem;
sed líbera nos a malo.

Pater noster.....

ORATIO
Deus, qui cónspicis pópulum tuum nativitátis domínicæ festivitátem fidéliter exspectáre, præsta, quǽsumus, ut valeámus ad tantæ salútis gáudia perveníre, et ea votis sollémnibus álacri semper lætítia celebráre. Per Dóminum nostrum Iesum Christum, Fílium tuum, qui tecum vivit et regnat in unitáte Spíritus Sancti, Deus, per ómnia sǽcula sæculórum.

    Deinde, si præest sacerdos vel diaconus, populum dimittit, dicens:

Dóminus vobíscum.
R. Et cum spíritu tuo.
Benedícat vos omnípotens Deus,
Pater, et Fílius, † et Spíritus Sanctus.
R. Amen.

    Vel alia formula benedictionis, sicut in Missa.
    Et, si fit dimissio, sequitur invitatio:

Ite in pace. 
R. Deo grátias. 

    Absente sacerdote vel diacono, et in recitatione a solo, sic concluditur:

Dóminus nos benedícat,
et ab omni malo deféndat,
et ad vitam perdúcat ætérnam.
R. Amen.

Breviarium Romanum

textus in versione electronica © 2000-2023 Ing. Karel Mracek Dr.h.c. (fr. Pavel, diaconus, CZ)