BREVIARIUM ROMANUM

5 augustus 2028
In Transfiguratione Domini, festum

V. Deus, in adiutórium meum inténde.
R. Dómine, ad adiuvándum me festína.

Glória Patri et Fílio et Spirítui Sancto,
sicut erat in princípio et nunc et semper
et in sǽcula sæculórum. Amen.  Allelúia.

HYMNUS

O nata lux de lúmine,
Iesu, redémptor sǽculi,
dignáre clemens súpplicum
laudes precésque súmere.

Præ sole vultu flámmeus,
ut nix amíctu cándidus,
in monte dignis téstibus
apparuísti cónditor.

Vates alúmnis ábditos
novis vetústos cónferens,
utrísque te divínitus
Deum dedísti crédere.

Te vox patérna cǽlitus
suum vocávit Fílium,
quem nos fidéli péctore
regem fatémur cǽlitum.

Qui carne quondam cóntegi
dignátus es pro pérditis,
nos membra confer éffici
tui beáti córporis.

Laudes tibi nos pángimus,
diléctus es qui Fílius,
quem Patris atque Spíritus
splendor revélat ínclitus. Amen.

PSALMODIA

Ant. 1 Assúmpsit Iesus discípulos suos, et ascéndit in montem, et transfigurátus est ante eos.

Deposuit potentes de sede et exaltavit humiles. (Lc 1, 52)

¹ Laudáte, púeri Dómini, *
      laudáte nomen Dómini.
² Sit nomen Dómini benedíctum *
      ex hoc nunc et usque in sǽculum.
³ A solis ortu usque ad occásum *
      laudábile nomen Dómini. –

⁴ Excélsus super omnes gentes Dóminus, *
      super cælos glória eius.
⁵ Quis sicut Dóminus Deus noster, qui in altis hábitat *
⁶     et se inclínat, ut respíciat in cælum et in terram? -

⁷ Súscitans de terra ínopem, *
      de stércore érigens páuperem,
⁸ ut cóllocet eum cum princípibus, *
      cum princípibus pópuli sui. –

⁹ Qui habitáre facit stérilem in domo, *
      matrem filiórum lætántem.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 1 Assúmpsit Iesus discípulos suos, et ascéndit in montem, et transfigurátus est ante eos.

Ant. 2 Et ecce apparuérunt eis Móyses et Elías loquéntes cum Iesu.

Dico ... gentes propter misericordiam glorificare Deum. (Rom 15, 8. 9)

¹ Laudáte Dóminum, omnes gentes, *
      collaudáte eum, omnes pópuli. –

² Quóniam confirmáta est super nos misericórdia eius, *
      et véritas Dómini manet in ætérnum.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 2 Et ecce apparuérunt eis Móyses et Elías loquéntes cum Iesu.

Ant. 3 Dómine, bonum est nos hic esse; si vis, faciámus hic tria tabernácula: tibi unum, Móysi unum et Elíæ unum.

Sequens canticum dicitur cum Allelúia prouti hic notatur, quando cum cantu profertur; in recitatione vero sufficit ut Allelúia dicatur in initio et fine uniuscuiusque strophæ.

   Allelúia.
¹ Salus et glória et virtus Deo nostro, *
   (R.  Allelúia.)
² quia vera et iusta iudícia eius.
   R.  Allelúia (allelúia).

   Allelúia.
⁵ Laudem dícite Deo nostro, omnes servi eius *
   (R.  Allelúia.)
   et qui timétis eum, pusílli et magni!
   R.  Allelúia (allelúia).

   Alléluia.
⁶ Quóniam regnávit Dóminus, Deus noster omnípotens *
   (R.  Allelúia.)
⁷ Gaudeámus et exsultémus et demus glóriam ei.
   R.  Allelúia (allelúia).

   Allelúia.
   Quia venérunt núptiæ Agni, *
   (R.  Allelúia.)
   et uxor eius præparávit se.
   R.  Allelúia (allelúia).

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 3 Dómine, bonum est nos hic esse; si vis, faciámus hic tria tabernácula: tibi unum, Móysi unum et Elíæ unum.

LECTIO BREVIS

RESPONSORIUM BREVE
V. Gloriósus apparuísti in conspéctu Dómini, * allelúia, allelúia.
R. Gloriósus apparuísti in conspéctu Dómini, * allelúia, allelúia.
V. Proptérea decórem índuit te Dóminus.
R. Allelúia, allelúia.
V. Glória Patri et Fílio * et Spirítui Sancto.
R. Gloriósus apparuísti in conspéctu Dómini, * allelúia, allelúia.

MAGNIFICAT

Ad Magnificat, ant. Christus Iesus splendor Patris et figúra substántiæ eius, portans ómnia verbo virtútis suæ, purgatiónem peccatórum fáciens, in monte excélso gloriósus apparére hódie dignátus est.

⁴⁶ Magníficat *
     ánima mea Dóminum,
⁴⁷ et exsultávit spíritus meus *
      in Deo salvatóre meo,
⁴⁸ quia respéxit humilitátem ancíllæ suæ. *
      Ecce enim ex hoc beátam me dicent omnes generatiónes,
⁴⁹ quia fecit mihi magna, qui potens est, *
      et sanctum nomen eius,
⁵⁰ et misericórdia eius in progénies et progénies *
      timéntibus eum.

⁵¹ Fecit poténtiam in bráchio suo, *
      dispérsit supérbos mente cordis sui;
⁵² depósuit poténtes de sede *
      et exaltávit húmiles;
⁵³ esuriéntes implévit bonis *
      et dívites dimísit inánes.

⁵⁴ Suscépit Israel púerum suum, *
      recordátus misericórdiæ,
⁵⁵ sicut locútus est ad patres nostros, *
      Abraham et sémini eius in sǽcula.

Ad Magnificat, ant. Christus Iesus splendor Patris et figúra substántiæ eius, portans ómnia verbo virtútis suæ, purgatiónem peccatórum fáciens, in monte excélso gloriósus apparére hódie dignátus est.

PRECES
Salvatórem nostrum, qui in monte ante discípulos mirabíliter transfigurátus est, fidénter deprecémur:
    Deus noster, illúmina ténebras nostras.

Christe, qui transfigurátus revelásti discípulis tuis resurrectiónem ante passiónem, orámus te pro Ecclésia tua sancta laboránte in necessitátibus mundi,
— ut in tribulatióne semper transfigurétur victóriæ tuæ gáudio.
Christe, qui assumpsísti Petrum cum Iacóbo et Ioánne et duxísti eos in montem excélsum seórsum, orámus te pro Papa nostro
N. et epíscopis,
— ut pópulo tuo in spe resurrectiónis minístrent.
Christe, qui in monte illuminásti fáciem tuam super Móysen et Elíam, orámus te pro Iudǽis, pópulo acquisitiónis antíquæ,
— ut ad redemptiónis mereántur plenitúdinem perveníre.
Christe, qui terræ illuxísti, cum glória Creatóris super te orta est, orámus te pro homínibus bonæ voluntátis,
— ut ámbulent in lúmine tuo.
Christe, qui reformábis corpus humilitátis nostræ configurátum córpori claritátis tuæ, orámus te pro frátribus nostris defúnctis,
— ut intrent in glóriam tuam.

Pater noster, qui es in cælis,
sanctificétur nomen tuum;
advéniat regnum tuum;
fiat volúntas tua, sicut in cælo et in terra.
Panem nostrum cotidiánum da nobis hódie;
et dimítte nobis débita nostra,
sicut et nos dimíttimus debitóribus nostris;
et ne nos indúcas in tentatiónem;
sed líbera nos a malo.