BREVIARIUM ROMANUM

29 augustus 2028
In passione S. Ioannis Baptistæ, memoria

V. Deus, in adiutórium meum inténde.
R. Dómine, ad adiuvándum me festína.

Glória Patri et Fílio et Spirítui Sancto,
sicut erat in princípio et nunc et semper
et in sǽcula sæculórum. Amen.  Allelúia.

HYMNUS

Præcéssor almus grátiæ
et veritátis ángelus,
lucérna Christi et pérpetis
evangelísta lúminis,

Prophetíæ præcónia,
quæ voce, vita et áctibus
cantáverat, hæc ástruit
mortis sacræ signáculo.

Nam nascitúrum sǽculis,
nascéndo quem prævénerat,
sed et datórem próprii
monstráverat baptísmatis,

Huiúsce mortem innóxiam,
qua vita mundo est réddita,
signat sui præságio
baptísta martyr sánguinis.

Præsta, Pater piíssime,
sequi Ioánnis sémitas,
metámus ut pleníssime
ætérna Christi múnera. Amen.

PSALMODIA

Ant. 1 Ne tímeas a fácie eórum, quia ego tecum sum, dicit Dóminus.

Per multas tribulationes oportet nos intrare in regnum Dei. (Act 14, 22)

¹ Diléxi, quóniam exáudit Dóminus *
      vocem deprecatiónis meæ.
² Quia inclinávit aurem suam mihi, *
      cum in diébus meis invocábam. –

³ Circumdedérunt me funes mortis, *
      et angústiæ inférni invenérunt me.
   Tribulatiónem et dolórem invéni †
⁴    et nomen Dómini invocábam: *
      „O Dómine, líbera ánimam meam.“ –

⁵ Miséricors Dóminus et iustus, *
      et Deus noster miserétur.
⁶ Custódiens párvulos Dóminus; *
      humiliátus sum, et salvum me fáciet. –

⁷ Convértere, ánima mea, in réquiem tuam, *
      quia Dóminus benefécit tibi;
⁸ quia erípuit ánimam meam de morte, †
      óculos meos a lácrimis, *
      pedes meos a lapsu.
⁹ Ambulábo coram Dómino *
      in regióne vivórum.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 1 Ne tímeas a fácie eórum, quia ego tecum sum, dicit Dóminus.

Ant. 2 Misso Heródes spiculatóre, præcépit amputári caput Ioánnis in cárcere.

Per ipsum (Christum) offeramus hóstiam laudis semper Deo. (Hebr 13, 15)

¹⁰ Crédidi, étiam cum locútus sum: *
      „Ego humiliátus sum nimis.“
¹¹ Ego dixi in trepidatióne mea: *
      „Omnis homo mendax.“ –

¹² Quid retríbuam Dómino *
      pro ómnibus, quæ retríbuit mihi?
¹³ Cálicem salutáris accípiam *
      et nomen Dómini invocábo. –

¹⁴ Vota mea Dómino reddam *
      coram omni pópulo eius.
¹⁵ Pretiósa in conspéctu Dómini *
      mors sanctórum eius. –

¹⁶ O Dómine, ego servus tuus, *
      ego servus tuus et fílius ancíllæ tuæ.
    Dirupísti víncula mea: †
¹⁷    tibi sacrificábo hóstiam laudis *
      et nomen Dómini invocábo. –

¹⁸ Vota mea Dómino reddam *
      coram omni pópulo eius,
¹⁹ in átriis domus Dómini, *
      in médio tui, Ierúsalem.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 2 Misso Heródes spiculatóre, præcépit amputári caput Ioánnis in cárcere.

Ant. 3 Ioánnis discípuli venérunt, et tulérunt corpus eius, et posuérunt illud in monuménto.

^5,9 Dignus es, Dómine, accípere librum *
         et aperíre signácula eius,
     quóniam occísus es †
         et redemísti Deo in sánguine tuo *
         ex omni tribu et lingua et pópulo et natióne
¹⁰ et fecísti eos Deo nostro regnum et sacerdótes, *
         et regnábunt super terram. –

¹² Dignus est Agnus, qui occísus est, †
         accípere virtútem et divítias et sapiéntiam *
         et fortitúdinem et honórem et glóriam et benedictiónem.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 3 Ioánnis discípuli venérunt, et tulérunt corpus eius, et posuérunt illud in monuménto.

LECTIO BREVIS

RESPONSORIUM BREVE
V. Amícus sponsi gaudet * propter vocem sponsi.
R. Amícus sponsi gaudet * propter vocem sponsi.
V. Hoc gáudium meum implétum est.
R. Propter vocem sponsi.
V. Glória Patri et Fílio * et Spirítui Sancto.
R. Amícus sponsi gaudet * propter vocem sponsi.

MAGNIFICAT

Ad Magnificat, ant. Non sum ego Christus, sed missus sum ante illum. Opórtet illum créscere, me autem mínui.

⁴⁶ Magníficat *
     ánima mea Dóminum,
⁴⁷ et exsultávit spíritus meus *
      in Deo salvatóre meo,
⁴⁸ quia respéxit humilitátem ancíllæ suæ. *
      Ecce enim ex hoc beátam me dicent omnes generatiónes,
⁴⁹ quia fecit mihi magna, qui potens est, *
      et sanctum nomen eius,
⁵⁰ et misericórdia eius in progénies et progénies *
      timéntibus eum.

⁵¹ Fecit poténtiam in bráchio suo, *
      dispérsit supérbos mente cordis sui;
⁵² depósuit poténtes de sede *
      et exaltávit húmiles;
⁵³ esuriéntes implévit bonis *
      et dívites dimísit inánes.

⁵⁴ Suscépit Israel púerum suum, *
      recordátus misericórdiæ,
⁵⁵ sicut locútus est ad patres nostros, *
      Abraham et sémini eius in sǽcula.

Ad Magnificat, ant. Non sum ego Christus, sed missus sum ante illum. Opórtet illum créscere, me autem mínui.

PRECES
Deum, qui elégit Ioánnem Baptístam ut regnum Christi ventúrum homínibus annuntiáret, lætánter deprecémur:
     Dírige, Dómine, pedes nostros in viam pacis.

Tu, qui Ioánnem a ventre matris eius vocásti ad præparándas vias Fílii tui,
— voca nos ad Dóminum ita sequéndum, sicut eum ipse præcéssit.
Sicut dedísti Baptístæ Agnum Dei agnóscere, fac ut ipsum Ecclésia tua demónstret,
— et hómines huius témporis agnóscant.
Tu, qui disposuísti prophétam tuum mínui et Christum créscere,
— doce nos erga álios húmiles esse, ut manifestéris.
Tu, qui per martýrium Ioánnis iustítiam vindicáre voluísti,
— fac nos veritátem tuam indeficiénter testificári.
Meménto ómnium, qui ex hoc sǽculo transiérunt,
— illos constítue in regióne lucis et pacis.

Pater noster, qui es in cælis,
sanctificétur nomen tuum;
advéniat regnum tuum;
fiat volúntas tua, sicut in cælo et in terra.
Panem nostrum cotidiánum da nobis hódie;
et dimítte nobis débita nostra,
sicut et nos dimíttimus debitóribus nostris;
et ne nos indúcas in tentatiónem;
sed líbera nos a malo.

Pater noster.....

ORATIO
Deus, qui beátum Ioánnem Baptístam et nascéntis et moriéntis Fílii tui Præcursórem esse voluísti, concéde, ut, sicut ille veritátis et iustítiæ martyr occúbuit, ita et nos pro tuæ confessióne doctrínæ strénue certémus. Per Dóminum nostrum Iesum Christum, Fílium tuum, qui tecum vivit et regnat in unitáte Spíritus Sancti, Deus, per ómnia sǽcula sæculórum.

    Deinde, si præest sacerdos vel diaconus, populum dimittit, dicens:

Dóminus vobíscum.
R. Et cum spíritu tuo.
Benedícat vos omnípotens Deus,
Pater, et Fílius, † et Spíritus Sanctus.
R. Amen.

    Vel alia formula benedictionis, sicut in Missa.
    Et, si fit dimissio, sequitur invitatio:

Ite in pace. 
R. Deo grátias. 

    Absente sacerdote vel diacono, et in recitatione a solo, sic concluditur:

Dóminus nos benedícat,
et ab omni malo deféndat,
et ad vitam perdúcat ætérnam.
R. Amen.

Breviarium Romanum

textus in versione electronica © 2000-2023 Ing. Karel Mracek Dr.h.c. (fr. Pavel, diaconus, CZ)