☼ lat ☰

BREVIARIUM ROMANUM

27 maius 2023
Pro O.P.: B. Andreæ Franchi, episcopi


Pistoriis [Pistoia], in Italia, anno 1335 natus, ex nobili genere de Franchis seu de Boccagnis, adulescens 14 annorum Florentiae Ordinem Praedicatorum ingressus est. Vitam regularem post pestem nigram restauravit. Prior patrii conventus (1370) dein Lucani et Urbevetani (1371-75), episcopus Pistoriensis demum renuntiatus (1382), strenuus pacis promotor in populo suo exstitit et pastor pervigil, pietate austeritate et praedicatione conspicuus. Peculiari devotione infantem Iesum cum Virgine Matre et Magis coluit. Advenas et peregrinos ad mensam suam recipiens, ipsis inserviebat ac pedes lavabat. Liberalium artium cultor multa praeclara Pistoriis agenda curavit. Demisso post 18 annos pastorali munere (1400), ad suum rediit conventum, ubi simpliciter ac religiose conversatus est. Obiit die 26 maii 1401. Cultus illi praestitus die 23 novembris 1921 a Benedicto XV confirmatus fuit.

AD INVITATORIUM

    Invitatorium locum suum habet initio totius cursus orationis cotidianæ, scilicet præponitur aut Officio lectionis, aut Laudibus matutinis, prout ab alterutra actione liturgica dies incipit.
    Psalmo 94 (95) substitui potest psalmus 99 (100), vel 66 (67), vel 23 (24), qui, si occurrit in Officio, eius loco dicitur psalmus 94 (95).

V. Dómine, lábia mea apéries.
R. Et os meum annuntiábit laudem tuam.

Ant. Christum, pastórum príncipem, veníte, adorémus. Allelúia.

Psalmus 94 (95)

1 Veníte, exsultémus Dómino; *
      iubilémus Deo salutári nostro.
2  Præoccupémus fáciem eius in confessióne *
      et in psalmis iubilémus ei.

Ant. Christum, pastórum príncipem, veníte, adorémus. Allelúia.

3 Quóniam Deus magnus Dóminus *
      et rex magnus super omnes deos.
4 Quia in manu eius sunt profúnda terræ, *
      et altitúdines móntium ipsíus sunt.
5 Quóniam ipsíus est mare, et ipse fecit illud, *
      et siccam manus eius formavérunt.

Ant. Christum, pastórum príncipem, veníte, adorémus. Allelúia.

6 Veníte, adorémus et procidámus *
      et génua flectámus ante Dóminum, qui fecit nos,
7 quia ipse est Deus noster, *
      et nos pópulus páscuæ eius et oves manus eius.

Ant. Christum, pastórum príncipem, veníte, adorémus. Allelúia.

   Utinam hódie vocem eius audiátis: *
8     «Nolíte obduráre corda vestra,
   sicut in Meríba secúndum diem Massa in desérto, †
9    ubi tentavérunt me patres vestri: *
     probavérunt me, etsi vidérunt ópera mea.

Ant. Christum, pastórum príncipem, veníte, adorémus. Allelúia.

10 Quadragínta annis tǽduit me generatiónis illíus, *
       et dixi: Pópulus errántium corde sunt isti.
11 Et ipsi non cognovérunt vias meas; †
       ídeo iurávi in ira mea: *
       Non introíbunt in réquiem meam».

Ant. Christum, pastórum príncipem, veníte, adorémus. Allelúia.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. Christum, pastórum príncipem, veníte, adorémus. Allelúia.

Vel:
(Psalmus sequens in psalterio currente adhibitur feria VI hebd. I atque feria VI hebd. III)

Ant. Christum, pastórum príncipem, veníte, adorémus. Allelúia.

Psalmus 99 (100)

1 Iubiláte Dómino, omnis terra, *
      servíte Dómino in lætítia;
2 introíte in conspéctu eius *
      in exsultatióne. –

Ant. Christum, pastórum príncipem, veníte, adorémus. Allelúia.

3 Scitóte quóniam Dóminus ipse est Deus; †
      ipse fecit nos, et ipsíus sumus, *
      pópulus eius et oves páscuæ eius. –

Ant. Christum, pastórum príncipem, veníte, adorémus. Allelúia.

4 Introíte portas eius in confessióne, †
      átria eius in hymnis, *
      confitémini illi, benedícite nómini eius. –
5 Quóniam suávis est Dóminus; †
      in ætérnum misericórdia eius, *
      et usque in generatiónem et generatiónem véritas eius.

Ant. Christum, pastórum príncipem, veníte, adorémus. Allelúia.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. Christum, pastórum príncipem, veníte, adorémus. Allelúia.

Vel:
(Psalmus sequens in psalterio currente adhibitur feria IV hebd. II atque feria III hebd. III)

Ant. Christum, pastórum príncipem, veníte, adorémus. Allelúia.

Psalmus 66 (67)

2 Deus misereátur nostri et benedícat nobis; *
      illúminet vultum suum super nos,
3 ut cognoscátur in terra via tua, *
      in ómnibus géntibus salutáre tuum. –

Ant. Christum, pastórum príncipem, veníte, adorémus. Allelúia.

4 Confiteántur tibi pópuli, Deus; *
      confiteántur tibi pópuli omnes.
5 Læténtur et exsúltent gentes, †
      quóniam iúdicas pópulos in æquitáte *
      et gentes in terra dírigis. –

Ant. Christum, pastórum príncipem, veníte, adorémus. Allelúia.

6 Confiteántur tibi pópuli, Deus, *
      confiteántur tibi pópuli omnes.
7 Terra dedit fructum suum; *
      benedícat nos Deus, Deus noster,
8 benedícat nos Deus, *
      et métuant eum omnes fines terræ.

Ant. Christum, pastórum príncipem, veníte, adorémus. Allelúia.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. Christum, pastórum príncipem, veníte, adorémus. Allelúia.

Vel:
(Psalmus sequens in psalterio currente adhibitur feria III hebd. I atque dominica hebd. IV)

Ant. Christum, pastórum príncipem, veníte, adorémus. Allelúia.

Psalmus 23 (24)

1 Dómini est terra et plenitúdo eius, *
      orbis terrárum et qui hábitant in eo.
2 Quia ipse super mária fundávit eum *
      et super flúmina firmávit eum. –

Ant. Christum, pastórum príncipem, veníte, adorémus. Allelúia.

3 Quis ascéndet in montem Dómini, *
      aut quis stabit in loco sancto eius?
4 Innocens mánibus et mundo corde, †
      qui non levávit ad vana ánimam suam, *
      nec iurávit in dolum.
5 Hic accípiet benedictiónem a Dómino *
      et iustificatiónem a Deo salutári suo.
6 Hæc est generátio quæréntium eum, *
      quæréntium fáciem Dei Iacob. –

Ant. Christum, pastórum príncipem, veníte, adorémus. Allelúia.

7 Attóllite, portæ, cápita vestra, †
      et elevámini, portæ æternáles, *
      et introíbit rex glóriæ.
8 Quis est iste rex glóriæ? *
      Dóminus fortis et potens, Dóminus potens in prœlio. –

Ant. Christum, pastórum príncipem, veníte, adorémus. Allelúia.

9 Attóllite, portæ, cápita vestra, †
      et elevámini, portæ æternáles, *
      et introíbit rex glóriæ.
10 Quis est iste rex glóriæ? *
      Dóminus virtútum ipse est rex glóriæ.

Ant. Christum, pastórum príncipem, veníte, adorémus. Allelúia.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. Christum, pastórum príncipem, veníte, adorémus. Allelúia.

Breviarium Romanum

textus in versione electronica © 2000-2023 Ing. Karel Mracek Dr.h.c. (fr. Pavel, diaconus, CZ)