BREVIARIUM ROMANUM

27 februarius 2010
TEMPUS QUADRAGESIMÆ, hebd. I
Hebdomada I

V. Deus, in adiutórium meum inténde.
R. Dómine, ad adiuvándum me festína.

Glória Patri et Fílio et Spirítui Sancto,
sicut erat in princípio et nunc et semper
et in sǽcula sæculórum. Amen.  

HYMNUS

Dei fide, qua vívimus,
qua spe perénni crédimus,
per caritátis grátiam
Christi canámus glóriam,

Qui ductus hora tértia
ad passiónis hóstiam,
crucis ferens suspéndia
ovem redúxit pérditam.

Precémur ergo súbditi,
redemptióne líberi,
ut éruat a sǽculo
quos solvit a chirógrapho.

Christum rogámus et Patrem,
Christi Patrísque Spíritum;
unum potens per ómnia,
fove precántes, Trínitas. Amen.

PSALMODIA

Ant. Advenérunt nobis dies pæniténtiæ ad rediménda peccáta, ad salvándas ánimas.

In tribulatione patientes, orationi instantes. (Rom 12, 12)

¹ Ad Dóminum, cum tribulárer, clamávi, *
      et exaudívit me.

² Dómine, líbera ánimam meam a lábiis mendácii, *
      a lingua dolósa.
³ Quid detur tibi aut quid apponátur tibi, *
      lingua dolósa?
⁴ Sagíttæ poténtis acútæ *
      cum carbónibus iuniperórum.

⁵ Heu mihi, quia peregrinátus sum in Mosoch, *
      habitávi ad tabernácula Cedar!
⁶ Multum íncola fuit ánima mea *
      cum his, qui odérunt pacem.
⁷ Ego eram pacíficus; *
      cum loquébar, illi impugnábant me.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Non esurient amplius, neque sitient amplius, neque cadet super illos sol neque ullus æstus. (Ap 7, 16)

¹ Levábo óculos meos in montes: *
      unde véniet auxílium mihi?
² Auxílium meum a Dómino, *
      qui fecit cælum et terram. –

³ Non dabit in commotiónem pedem tuum, *
      neque dormitábit, qui custódit te.
⁴ Ecce non dormitábit neque dórmiet, *
      qui custódit Israel. –

⁵ Dóminus custódit te, †
      Dóminus umbráculum tuum, *
      ad manum déxteram tuam.
⁶ Per diem sol non percútiet te, *
      neque luna per noctem. –

⁷ Dóminus custódiet te ab omni malo; *
      custódiet ánimam tuam Dóminus.
⁸ Dóminus custódiet intróitum tuum et éxitum tuum *
      ex hoc nunc et usque in sǽculum.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Accessistis ad Sion montem et civitatem Dei viventis, Ierusalem cælestem. (Hebr 12, 22)

¹ Lætátus sum in eo quod dixérunt mihi: *
      „In domum Dómini íbimus.“
² Stantes iam sunt pedes nostri *
      in portis tuis, Ierúsalem. –

³ Ierúsalem, quæ ædificáta est ut cívitas, *
      sibi compácta in idípsum.
⁴ Illuc enim ascendérunt tribus, tribus Dómini, *
      testimónium Israel, ad confiténdum nómini Dómini.
⁵ Quia illic sedérunt sedes ad iudícium, *
      sedes domus David. –

⁶ Rogáte, quæ ad pacem sunt Ierúsalem: *
      „Secúri sint diligéntes te!
⁷ Fiat pax in muris tuis, *
      et secúritas in túrribus tuis!“ –

⁸ Propter fratres meos et próximos meos *
      loquar: „Pax in te!“
⁹ Propter domum Dómini Dei nostri *
      exquíram bona tibi.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. Advenérunt nobis dies pæniténtiæ ad rediménda peccáta, ad salvándas ánimas.

LECTIO BREVIS

ORATIO

Orémus:

Ad te corda nostra, Pater ætérne, convérte, ut nos, unum necessárium semper quæréntes et ópera caritátis exercéntes, tuo cúltui præstes esse dicátos. Per Christum Dóminum nostrum.

    Deinde, saltem in celebratione communi, additur acclamatio:

Benedicámus Dómino.
R. Deo grátias.

Breviarium Romanum

textus in versione electronica © 2000-2023 Ing. Karel Mracek Dr.h.c. (fr. Pavel, diaconus, CZ)