BREVIARIUM ROMANUM

31 december 2022
S. Silvestri I, papæ

V. Deus, in adiutórium meum inténde.
R. Dómine, ad adiuvándum me festína.

Glória Patri et Fílio et Spirítui Sancto,
sicut erat in princípio et nunc et semper
et in sǽcula sæculórum. Amen.   Allelúia.

HYMNUS

Rector potens, verax Deus,
qui témperas rerum vices,
splendóre mane ínstruis
et ígnibus merídiem,

Exstíngue flammas lítium,
aufer calórem nóxium,
confer salútem córporum
verámque pacem córdium.

Præsta, Pater piíssime,
Patríque compar Unice,
cum Spíritu Paráclito
regnans per omne sǽculum. Amen.

PSALMODIA

Ant. María autem conservábat ómnia verba hæc, cónferens in corde suo.

³³ Legem pone mihi, Dómine, viam iustificatiónum tuárum, *
      et servábo eam semper.
³⁴ Da mihi intelléctum, et servábo legem tuam *
      et custódiam illam in toto corde meo. –

³⁵ Deduc me in sémitam præceptórum tuórum, *
      quia ipsam vólui.
³⁶ Inclína cor meum in testimónia tua *
      et non in avarítiam. –

³⁷ Avérte óculos meos, ne vídeant vanitátem; *
      in via tua vivífica me.
³⁸ Súscita servo tuo elóquium tuum, *
      quod est ad timórem tuum. –

³⁹ Amove oppróbrium meum, quod suspicátus sum, *
      quia iudícia tua iucúnda.
⁴⁰ Ecce concupívi mandáta tua; *
      in iustítia tua vivífica me.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Gustastis quóniam dulcis Dominus (1 Petr 2, 3).

² Benedícam Dóminum in omni témpore, *
      semper laus eius in ore meo.
³ In Dómino gloriábitur ánima mea, *
      áudiant mansuéti et læténtur.
⁴ Magnificáte Dóminum mecum, *
      et exaltémus nomen eius in idípsum. –

⁵ Exquisívi Dóminum, et exaudívit me *
      et ex ómnibus terróribus meis erípuit me.
⁶ Respícite ad eum, et illuminámini *
      et fácies vestræ non confundéntur.

⁷ Iste pauper clamávit, †
      et Dóminus exaudívit eum *
      et de ómnibus tribulatiónibus eius salvávit eum.
⁸ Vallábit ángelus Dómini in circúitu timéntes eum *
      et erípiet eos. –

⁹ Gustáte et vidéte quóniam suávis est Dóminus; *
      beátus vir, qui sperat in eo.
¹⁰ Timéte Dóminum, sancti eius, *
       quóniam non est inópia timéntibus eum.
¹¹ Dívites eguérunt et esuriérunt, *
       inquiréntes autem Dóminum non defícient omni bono.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

¹² Veníte, fílii, audíte me: *
       timórem Dómini docébo vos.
¹³ Quis est homo, qui vult vitam, *
       díligit dies, ut vídeat bonum? –

¹⁴ Próhibe linguam tuam a malo, *
       et lábia tua ne loquántur dolum.
¹⁵ Divérte a malo et fac bonum, *
       inquíre pacem et perséquere eam. –

¹⁶ Oculi Dómini super iustos, *
       et aures eius in clamórem eórum.
¹⁷ Vultus autem Dómini super faciéntes mala, *
       ut perdat de terra memóriam eórum. –

¹⁸ Clamavérunt, et Dóminus exaudívit *
       et ex ómnibus tribulatiónibus eórum liberávit eos.
¹⁹ Iuxta est Dóminus iis, qui contríto sunt corde, *
       et confráctos spíritu salvábit. –

²⁰ Multæ tribulatiónes iustórum, *
       et de ómnibus his liberábit eos Dóminus.
²¹ Custódit ómnia ossa eórum, *
       unum ex his non conterétur. –

²² Interfíciet peccatórem malítia, *
       et, qui odérunt iustum, puniéntur.
²³ Rédimet Dóminus ánimas servórum suórum, *
       et non puniéntur omnes, qui sperant in eo.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. María autem conservábat ómnia verba hæc, cónferens in corde suo.

LECTIO BREVIS

ORATIO

Orémus:

Omnípotens sempitérne Deus, qui in Fílii tui nativitáte tribuísti totíus religiónis inítium perfectionémque constáre, da nobis, quǽsumus, in eius portióne censéri, in quo totíus salútis humánæ summa consístit. Per Christum Dóminum nostrum.

    Deinde, saltem in celebratione communi, additur acclamatio:

Benedicámus Dómino.
R. Deo grátias.

Breviarium Romanum

textus in versione electronica © 2000-2023 Ing. Karel Mracek Dr.h.c. (fr. Pavel, diaconus, CZ)