☼ lat ☰

BREVIARIUM ROMANUM

3 november 2026
Pro O.P.: S. Martini de Porres, religiosi


Ex equite hispano Ioanne et Anna Velasquez liberta nigri coloris Limæ in Peruvia anno 1579 natus, inter sanctos Martinus est testimonium populi nigri coloris dolenter in Novo Mundo humiliati. Barbitonsoris adiutor erat, cum Ordinem sancti Dominici postulavit amplecti et inter laicos conventus B. M. Virginis de Rosario Limæ adlectus fuit, ubi anno 1603 admissus est ut vota sollemnia profiteretur. Mira simplicitate, innocentia et fide prǽditus, humilibus deputatus muneribus, cælestibus vero donis et charismatibus a Deo exaltatus est. Erga Eucharisticum mysterium et Redemptoris passionem summa flagrans pietate, caritatis operibus in pauperes, præsertim ægrotos, et in animalia étiam, plene vixit deditus, dignus qui Fratribus cooperatoribus cælestis patronus assignaretur. Ieiunium, asperrimam pænitentiam atque orationem, noctu præsertim sub exemplo Iesu, diligebat, ex illa hauriens lumina eius doctrinæ christianæ institutiones mirabiliter illustrantia. Die 3 novembris 1639 Limæ obiit. Gregorius XVI beatum illum declaravit anno 1837 et die 6 maii 1962 Ioannes XXIII inter sanctos adscripsit. Martinus omnium animos Americam tum septentrionalem tum meridionalem incolentium ad se allicit, non modo ob singularem humilitatem quæ per se attrahit sed quia ipsemet signum est.

AD SEXTAM

V. Deus, in adiutórium meum inténde.
R. Dómine, ad adiuvándum me festína.

Glória Patri et Fílio et Spirítui Sancto,
sicut erat in princípio et nunc et semper
et in sǽcula sæculórum. Amen.   Allelúia.

HYMNUS

Dicámus laudes Dómino
fervénte prompti spíritu;
hora volúta séxies
nos ad orándum próvocat.

In hac enim fidélibus
veræ salútis glória,
beáti Agni hóstia,
crucis virtúte rédditur.

Cuius luce claríssima
tenébricat merídies;
sumámus toto péctore
tanti splendóris grátiam.

Deo Patri sit glória
eiúsque soli Fílio
cum Spíritu Paráclito,
in sempitérna sǽcula. Amen.

PSALMODIA

Ant. 1 Plenitúdo legis est diléctio.

Psalmus 118 (119), 97-104
XIII (Mem)

97 Quómodo diléxi legem tuam, Dómine; *
      tota die meditátio mea est.
98 Super inimícos meos sapiéntem me fecit præcéptum tuum, *
      quia in ætérnum mihi est. –

99 Super omnes docéntes me prudens factus sum, *
      quia testimónia tua meditátio mea est.
100 Super senes intelléxi, *
        quia mandáta tua servávi.

101 Ab omni via mala prohíbui pedes meos, *
         ut custódiam verba tua.
102 A iudíciis tuis non declinávi, *
         quia tu legem posuísti mihi. –

103 Quam dúlcia fáucibus meis elóquia tua, *
         super mel ori meo.
104 A mandátis tuis intelléxi; *
         proptérea odívi omnem viam mendácii.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 1 Plenitúdo legis est diléctio.

Ant. 2 Memor esto congregatiónis tuæ, Dómine, quam possedísti ab inítio.

Psalmus 73 (74)
Lamentatio propter templum vastatum

Nolite timere eos, qui occidunt corpus. (Mt 10, 28)

I

1 Ut quid, Deus, reppulísti in finem, *
      irátus est furor tuus super oves páscuæ tuæ?
2 Memor esto congregatiónis tuæ, *
      quam possedísti ab inítio.
   Redemísti virgam hereditátis tuæ, *
      mons Sion, in quo habitásti.
3 Leva gressus tuos in ruínas sempitérnas: *
      ómnia vastávit inimícus in sancto. –

4 Rugiérunt, qui odérunt te, in médio congregatiónis tuæ; *
      posuérunt signa sua in signa.
5 Visi sunt quasi in altum secúrim vibrántes *
      in silva condénsa.
6 Excidérunt iánuas eius in idípsum; *
      in secúri et áscia deiecérunt. –

7 Incendérunt igni sanctuárium tuum, *
      in terram polluérunt tabernáculum nóminis tui;
8 dixérunt in corde suo: "Opprimámus eos simul." *
      Combussérunt omnes congregatiónes Dei in terra.
9 Signa nostra non vídimus, †
       iam non est prophéta, *
       et apud nos non est qui cognóscat ámplius. –

10 Usquequo, Deus, improperábit inimícus, *
       spernet adversárius nomen tuum in finem?
11 Ut quid avértis manum tuam *
       et tenes déxteram tuam in médio sinu tuo?
12 Deus autem rex noster ante sǽcula, *
       operátus est salútes in médio terræ.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 2 Memor esto congregatiónis tuæ, Dómine, quam possedísti ab inítio.

Ant. 3 Exsúrge, Dómine, et iúdica causam tuam.

II

13 Tu conscidísti in virtúte tua mare, *
       contribulásti cápita dracónum in aquis.
14 Tu confregísti cápita Levíathan, *
       dedísti eum escam monstris maris.
15 Tu dirupísti fontes et torréntes; *
       tu siccásti flúvios perénnes.
16 Tuus est dies et tua est nox, *
       tu fabricátus es luminária et solem.
17 Tu statuísti omnes términos terræ, *
       æstátem et híemem, tu plasmásti ea. –

18 Memor esto huius: †
       inimícus improperávit Dómino, *
       et pópulus insípiens sprevit nomen tuum.
19 Ne tradas béstiis ánimas confiténtes tibi *
       et ánimas páuperum tuórum ne obliviscáris in finem.
20 Réspice in testaméntum, *
       quia repléta sunt latíbula terræ tentóriis violéntiæ. –

21 Ne revertátur húmilis factus confúsus; *
       pauper et inops laudábunt nomen tuum.
22 Exsúrge, Deus, iúdica causam tuam; †
       memor esto improperiórum tuórum, *
       quæ ab insipiénte fiunt tota die.
23 Ne obliviscáris voces inimicórum tuórum; *
       tumúltus adversariórum tuórum ascéndit semper.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 3 Exsúrge, Dómine, et iúdica causam tuam.

LECTIO BREVIS

Gal 3, 28
Non est Iudǽus neque Græcus, non est servus neque liber, non est másculus et fémina. Omnes enim vos unum estis in Christo.


V. Congregávit nos in unum Christi amor.
R. Et ex corde diligámus nos sincéro.

ORATIO

Orémus:

Deus, qui beátum Martínum per humilitátis iter ad cæléstem glóriam perduxísti, tríbue nobis eius ita nunc pérsequi exémpla præclára, ut exaltári cum ipso mereámur in cælis. Per Christum Dóminum nostrum.

    Deinde, saltem in celebratione communi, additur acclamatio:

Benedicámus Dómino.
R. Deo grátias.

Breviarium Romanum

textus in versione electronica © 2000-2023 Ing. Karel Mracek Dr.h.c. (fr. Pavel, diaconus, CZ)