☼ lat ☰

BREVIARIUM ROMANUM

9 augustus 2014
S. Teresiæ Benedictæ a cruce, virginis et martyris


Nata est Breslaviæ (Wrocław, Breslau) in Germania anno 1891 et, in iudaica religione nata et instituta, aliquot annos magnas inter ærumnas philosophiam egregie professa est. Vitam novam in Christo per baptismum suscepit et, Teresiæ Benedictæ a Cruce nomine accepto, inter Carmelitas Discalceatas Coloniæ (Köln), ubi secessit, prosecuta est. Tempore persecutionis, exsul in Nederlandia, in captivitatem trusa, anno 1942 in campum exitii Oświęcim seu Auschwitz prope Cracoviam in Polonia deportata est et mortifero vapore enecata.

AD NONAM

V. Deus, in adiutórium meum inténde.
R. Dómine, ad adiuvándum me festína.

Glória Patri et Fílio et Spirítui Sancto,
sicut erat in princípio et nunc et semper
et in sǽcula sæculórum. Amen.   Allelúia.

HYMNUS

Rerum, Deus, tenax vigor,
immótus in te pérmanens,
lucis diúrnæ témpora
succéssibus detérminans,

Largíre clarum véspere,
quo vita numquam décidat,
sed prǽmium mortis sacræ
perénnis instet glória.

Præsta, Pater piíssime,
Patríque compar Unice,
cum Spíritu Paráclito
regnans per omne sǽculum. Amen.

PSALMODIA

Ant. 1 Cælum et terra transíbunt; verba autem mea non præteríbunt, dicit Dóminus.

Psalmus 118 (119), 81-88
XI (Caph)

81 Defécit in salutáre tuum ánima mea, *
      et in verbum tuum supersperávi.
82 Defecérunt óculi mei in elóquium tuum, *
      dicéntes: "Quando consoláberis me?" –

83 Quia factus sum sicut uter in fumo; *
      iustificatiónes tuas non sum oblítus.
84 Quot sunt dies servi tui? *
      Quando fácies de persequéntibus me iudícium? –

85 Fodérunt mihi fóveas supérbi, *
      qui non sunt secúndum legem tuam.
86 Omnia præcépta tua véritas; *
      dolóse persecúti sunt me: ádiuva me. –

87 Paulo minus consummavérunt me in terra, *
      ego autem non derelíqui mandáta tua.
88 Secúndum misericórdiam tuam vivífica me, *
      et custódiam testimónia oris tui.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 1 Cælum et terra transíbunt; verba autem mea non præteríbunt, dicit Dóminus.

Ant. 2 Tu, Dómine, spes mea, turris fortitúdinis a fácie inimíci.

Psalmus 60 (61)
Exsulis oratio

Oratio iusti æterna sperantis. (S. Hilarius)

2 Exáudi, Deus, deprecatiónem meam, *
      inténde oratióni meæ.
3 A fínibus terræ ad te clamávi, †
      dum anxiarétur cor meum. *
      In petram inaccéssam mihi deduc me! –

4 Quia factus es spes mea, *
      turris fortitúdinis a fácie inimíci.
5 Inhabitábo in tabernáculo tuo in sǽcula, *
      prótegar in velaménto alárum tuárum,
6 quóniam tu, Deus meus, exaudísti vota mea, *
      dedísti hereditátem timéntium nomen tuum. –

7 Dies super dies regis adícies, *
      annos eius usque in diem generatiónis et generatiónis.
8 Sédeat in ætérnum in conspéctu Dei; *
      misericórdia et véritas servent eum. –

9 Sic psalmum dicam nómini tuo in sǽculum sǽculi, *
      ut reddam vota mea de die in diem.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 2 Tu, Dómine, spes mea, turris fortitúdinis a fácie inimíci.

Ant. 3 A timóre inimíci custódi, Dómine, ánimam meam.

Psalmus 63 (64)
Contra hostes oratio

Maxime Domini passio commendatur in hoc psalmo. (S. Augustinus)

2 Exáudi, Deus, vocem meam in meditatióne mea; *
      a timóre inimíci custódi ánimam meam.
3 Prótege me a convéntu malignántium, *
      a multitúdine operántium iniquitátem. –

4 Qui exacuérunt ut gládium linguas suas, †
      intendérunt sagíttas suas, venéfica verba *
5     ut sagíttent in occúltis immaculátum.
   Súbito sagittábunt eum et non timébunt, *
6     firmavérunt sibi consílium nequam.
   Disputavérunt, ut abscónderent láqueos, *
      dixérunt: "Quis vidébit eos?"
7 Excogitavérunt iníqua, †
      perfecérunt excogitáta consília. *
      Interióra hóminis et cor eius abýssus. –

8 Et sagittávit illos Deus; †
      súbito factæ sunt plagæ eórum, *
9     et infirmávit eos lingua eórum.
   Caput movébunt omnes, qui vidébunt eos, *
10    et timébit omnis homo;
    et annuntiábunt ópera Dei *
       et facta eius intéllegent. –

11 Lætábitur iustus in Dómino et sperábit in eo, *
       et gloriabúntur omnes recti corde.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 3 A timóre inimíci custódi, Dómine, ánimam meam.

LECTIO BREVIS

Sap 3, 1-2a. 3b
Iustórum ánimæ in manu Dei sunt, et non tanget illos torméntum mortis. Visi sunt óculis insipiéntium mori; illi autem sunt in pace.

V. Veniéntes vénient cum exsultatióne.
R. Portántes manípulos suos.

ORATIO

Orémus:

Deus patrum nostrórum, qui beátam Terésiam Benedíctam mártyrem ad cognitiónem Fílii tui crucifíxi eiúsque imitatiónem usque ad mortem perduxísti, ipsa intercedénte concéde, ut omnes hómines Christum Salvatórem agnóscant et per eum ad perpétuam tui visiónem advéniant. Qui vivit et regnat in sǽcula sæculórum.

    Deinde, saltem in celebratione communi, additur acclamatio:

Benedicámus Dómino.
R. Deo grátias.

Breviarium Romanum

textus in versione electronica © 2000-2023 Ing. Karel Mracek Dr.h.c. (fr. Pavel, diaconus, CZ)