BREVIARIUM ROMANUM

20 iunius 2026
PER ANNUM, hebd. XI
Hebdomada III

V. Deus, in adiutórium meum inténde.
R. Dómine, ad adiuvándum me festína.

Glória Patri et Fílio et Spirítui Sancto,
sicut erat in princípio et nunc et semper
et in sǽcula sæculórum. Amen.   Allelúia.

HYMNUS

Ternis horárum términis
volútis, dante Dómino,
trinum perfécte et únicum
ipsum devóti psállimus.

Sacrum Dei mystérium
puro tenéntes péctore,
Petri magístri régula
signo salútis pródita,

Et nos psallámus spíritu,
hæréntes sic apóstolis,
ut plantas adhuc débiles
Christi virtúte dírigant.

Deo Patri sit glória
eiúsque soli Fílio
cum Spíritu Paráclito,
in sempitérna sǽcula. Amen.

PSALMODIA

Ant. 1 Súscipe, Dómine, servum tuum in bonum.

¹²¹ Feci iudícium et iustítiam; *
         non tradas me calumniántibus me.
¹²² Sponde pro servo tuo in bonum; *
         non calumniéntur me supérbi. –

¹²³ Oculi mei defecérunt in desidério salutáris tui *
         et elóquii iustítiæ tuæ.
¹²⁴ Fac cum servo tuo secúndum misericórdiam tuam *
         et iustificatiónes tuas doce me.

¹²⁵ Servus tuus sum ego; *
         da mihi intelléctum, ut sciam testimónia tua. –
¹²⁶ Tempus faciéndi Dómino; *
         dissipavérunt legem tuam. –

¹²⁷ ídeo diléxi præcépta tua *
         super aurum et obrýzum.
¹²⁸ Proptérea ad ómnia mandáta tua dirigébar, *
         omnem viam mendácii ódio hábui.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 1 Súscipe, Dómine, servum tuum in bonum.

Ant. 2 Respícite ad Dóminum, et illuminámini.

Gustastis quóniam dulcis Dominus (1 Petr 2, 3).

² Benedícam Dóminum in omni témpore, *
      semper laus eius in ore meo.
³ In Dómino gloriábitur ánima mea, *
      áudiant mansuéti et læténtur.
⁴ Magnificáte Dóminum mecum, *
      et exaltémus nomen eius in idípsum. –

⁵ Exquisívi Dóminum, et exaudívit me *
      et ex ómnibus terróribus meis erípuit me.
⁶ Respícite ad eum, et illuminámini *
      et fácies vestræ non confundéntur.

⁷ Iste pauper clamávit, †
      et Dóminus exaudívit eum *
      et de ómnibus tribulatiónibus eius salvávit eum.
⁸ Vallábit ángelus Dómini in circúitu timéntes eum *
      et erípiet eos. –

⁹ Gustáte et vidéte quóniam suávis est Dóminus; *
      beátus vir, qui sperat in eo.
¹⁰ Timéte Dóminum, sancti eius, *
       quóniam non est inópia timéntibus eum.
¹¹ Dívites eguérunt et esuriérunt, *
       inquiréntes autem Dóminum non defícient omni bono.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 2 Respícite ad Dóminum, et illuminámini.

Ant. 3 Iuxta est Dóminus his, qui contríto sunt corde.

¹² Veníte, fílii, audíte me: *
       timórem Dómini docébo vos.
¹³ Quis est homo, qui vult vitam, *
       díligit dies, ut vídeat bonum? –

¹⁴ Próhibe linguam tuam a malo, *
       et lábia tua ne loquántur dolum.
¹⁵ Divérte a malo et fac bonum, *
       inquíre pacem et perséquere eam. –

¹⁶ Oculi Dómini super iustos, *
       et aures eius in clamórem eórum.
¹⁷ Vultus autem Dómini super faciéntes mala, *
       ut perdat de terra memóriam eórum. –

¹⁸ Clamavérunt, et Dóminus exaudívit *
       et ex ómnibus tribulatiónibus eórum liberávit eos.
¹⁹ Iuxta est Dóminus iis, qui contríto sunt corde, *
       et confráctos spíritu salvábit. –

²⁰ Multæ tribulatiónes iustórum, *
       et de ómnibus his liberábit eos Dóminus.
²¹ Custódit ómnia ossa eórum, *
       unum ex his non conterétur. –

²² Interfíciet peccatórem malítia, *
       et, qui odérunt iustum, puniéntur.
²³ Rédimet Dóminus ánimas servórum suórum, *
       et non puniéntur omnes, qui sperant in eo.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 3 Iuxta est Dóminus his, qui contríto sunt corde.

LECTIO BREVIS

ORATIO

Orémus:

Exáudi nos, Dómine, et præsta pacem, quam pétimus, consummátam, ut cunctis diébus vitæ nostræ tibi cum iucunditáte vacántes, beáta María Vírgine intercedénte, ad te secúri perveníre mereámur. Per Christum, Dóminum nostrum.

    Deinde, saltem in celebratione communi, additur acclamatio:

Benedicámus Dómino.
R. Deo grátias.

Breviarium Romanum

textus in versione electronica © 2000-2023 Ing. Karel Mracek Dr.h.c. (fr. Pavel, diaconus, CZ)