BREVIARIUM ROMANUM

8 ianuarius 2013
Tempus nativitatis, hebd. II

V. Deus, in adiutórium meum inténde.
R. Dómine, ad adiuvándum me festína.

Glória Patri et Fílio et Spirítui Sancto,
sicut erat in princípio et nunc et semper
et in sǽcula sæculórum. Amen.  Allelúia.

HYMNUS

Hostis Heródes ímpie,
Christum veníre quid times?
Non éripit mortália
qui regna dat cæléstia.

Ibant magi, qua vénerant
stellam sequéntes prǽviam,
lumen requírunt lúmine,
Deum faténtur múnere.

Lavácra puri gúrgitis
cæléstis Agnus áttigit;
peccáta quæ non détulit
nos abluéndo sústulit.

Novum genus poténtiæ:
aquæ rubéscunt hýdriæ,
vinúmque iussa fúndere
mutávit unda oríginem.

Iesu, tibi sit glória,
qui te revélas géntibus,
cum Patre et almo Spíritu,
in sempitérna sǽcula. Amen.

PSALMODIA

Ant. 1 Non potéstis Deo servíre et mammónæ.

Dives difficile intrabit in regnum cælorum. (Mt 19, 23)

² Audíte hæc, omnes gentes, *
      áuribus percípite, omnes, qui habitátis orbem:
³ quique húmiles et viri nóbiles, *
      simul in unum dives et pauper! –

⁴ Os meum loquétur sapiéntiam *
      et meditátio cordis mei prudéntiam.
⁵ Inclinábo in parábolam aurem meam, *
      apériam in psaltério ænígma meum. –

⁶ Cur timébo in diébus malis, *
      cum iníquitas supplantántium circúmdabit me?
⁷ Qui confídunt in virtúte sua *
      et in multitúdine divitiárum suárum gloriántur. –

⁸ Etenim seípsum non rédimet homo; *
      non dabit Deo propitiatiónem suam.
⁹ Nímium est prétium redemptiónis ánimæ eius: †
       ad últimum defíciet, *
¹⁰    ut vivat usque in finem, nec vídeat intéritum.
¹¹ Et vidébit sapiéntes moriéntes; †
       simul insípiens et stultus períbunt *
       et relínquent aliénis divítias suas. –

¹² Sepúlcra eórum domus illórum in ætérnum; †
       tabernácula eórum in progéniem et progéniem, *
       etsi vocavérunt nomínibus suis terras suas.
¹³ Et homo, cum sit in honóre, non permanébit; †
       comparátus est iuméntis, quæ péreunt, *
       et símilis factus est illis.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 1 Non potéstis Deo servíre et mammónæ.

Ant. 2 Thesaurizáte vobis thesáuros in cælo, dicit Dóminus.

¹⁴ Hæc via illórum, quorum fidúcia in semetípsis, *
       et finis eórum, qui cómplacent in ore suo.
¹⁵ Sicut oves in inférno pósiti sunt, *
       mors depáscet eos;
    descéndent præcípites ad sepúlcrum, †
       et figúra eórum erit in consumptiónem: *
       inférnus habitáculum eórum. –

¹⁶ Verúmtamen Deus rédimet ánimam meam, *
       de manu ínferi vere suscípiet me.
¹⁷ Ne timúeris, cum dives factus fúerit homo *
       et cum multiplicáta fúerit glória domus eius,
¹⁸ quóniam, cum interíerit, non sumet ómnia, *
       neque descéndet cum eo glória eius. –

¹⁹ Cum ánimæ suæ in vita ipsíus benedíxerit: *
       „Laudábunt te quod benefecísti tibi“,
²⁰ tamen introíbit ad progéniem patrum suórum, *
       qui in ætérnum non vidébunt lumen. –

²¹ Homo, cum in honóre esset, non intelléxit; †
       comparátus est iuméntis, quæ péreunt, *
       et símilis factus est illis.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 2 Thesaurizáte vobis thesáuros in cælo, dicit Dóminus.

Ant. 3 Dignus est Agnus, qui occísus est, accípere glóriam et honórem.

^5,9 Dignus es, Dómine, accípere librum *
         et aperíre signácula eius,
     quóniam occísus es †
         et redemísti Deo in sánguine tuo *
         ex omni tribu et lingua et pópulo et natióne
¹⁰ et fecísti eos Deo nostro regnum et sacerdótes, *
         et regnábunt super terram. –

¹² Dignus est Agnus, qui occísus est, †
         accípere virtútem et divítias et sapiéntiam *
         et fortitúdinem et honórem et glóriam et benedictiónem.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 3 Dignus est Agnus, qui occísus est, accípere glóriam et honórem.

LECTIO BREVIS

RESPONSORIUM BREVE
V. Benedicéntur in ipso * omnes tribus terræ.
R. Benedicéntur in ipso * omnes tribus terræ.
V. Omnes gentes magnificábunt eum.
R. Omnes tribus terræ.
V. Glória Patri et Fílio * et Spirítui Sancto.
R. Benedicéntur in ipso * omnes tribus terræ.

MAGNIFICAT

Ad Magnificat, ant. Lux de luce apparuísti, Christe, cui magi múnera ófferunt, allelúia.

⁴⁶ Magníficat *
     ánima mea Dóminum,
⁴⁷ et exsultávit spíritus meus *
      in Deo salvatóre meo,
⁴⁸ quia respéxit humilitátem ancíllæ suæ. *
      Ecce enim ex hoc beátam me dicent omnes generatiónes,
⁴⁹ quia fecit mihi magna, qui potens est, *
      et sanctum nomen eius,
⁵⁰ et misericórdia eius in progénies et progénies *
      timéntibus eum.

⁵¹ Fecit poténtiam in bráchio suo, *
      dispérsit supérbos mente cordis sui;
⁵² depósuit poténtes de sede *
      et exaltávit húmiles;
⁵³ esuriéntes implévit bonis *
      et dívites dimísit inánes.

⁵⁴ Suscépit Israel púerum suum, *
      recordátus misericórdiæ,
⁵⁵ sicut locútus est ad patres nostros, *
      Abraham et sémini eius in sǽcula.

Ad Magnificat, ant. Lux de luce apparuísti, Christe, cui magi múnera ófferunt, allelúia.

PRECES
Cum ómnibus christiánis in laude et oratióne coniúncti, Dóminum deprecémur:
     Audi fílios tuos, Pater sancte.

Succúrre iis qui te, Deum ignótum, in umbris quærunt et imagínibus;
— récrea eos lúmine Christi.
Réspice omnes, qui te únicum Deum adórant et in die novíssimo iúdicem exspéctant;
— te semper propítium nobíscum agnóscant.
Meménto ómnium, quibus das vitam, lumen et ómnia;
— ne longe a te inveniántur.
Viatóres omnes angélica tutéla defénde,
— et eos a subitánea et improvísa morte serva.
Qui defúnctis veritátem tuam in terris ostendísti,
— duc eos usque ad spéciem tuæ celsitúdinis contemplándam.

Pater noster, qui es in cælis,
sanctificétur nomen tuum;
advéniat regnum tuum;
fiat volúntas tua, sicut in cælo et in terra.
Panem nostrum cotidiánum da nobis hódie;
et dimítte nobis débita nostra,
sicut et nos dimíttimus debitóribus nostris;
et ne nos indúcas in tentatiónem;
sed líbera nos a malo.

Pater noster.....

ORATIO
Deus, cuius Unigénitus in substántia nostræ carnis appáruit, præsta, quǽsumus, ut per eum, quem símilem nobis foris agnóvimus, intus reformári mereámur. Qui tecum vivit et regnat in unitáte Spíritus Sancti, Deus, per ómnia sǽcula sæculórum.

    Deinde, si præest sacerdos vel diaconus, populum dimittit, dicens:

Dóminus vobíscum.
R. Et cum spíritu tuo.
Benedícat vos omnípotens Deus,
Pater, et Fílius, † et Spíritus Sanctus.
R. Amen.

    Vel alia formula benedictionis, sicut in Missa.
    Et, si fit dimissio, sequitur invitatio:

Ite in pace. 
R. Deo grátias. 

    Absente sacerdote vel diacono, et in recitatione a solo, sic concluditur:

Dóminus nos benedícat,
et ab omni malo deféndat,
et ad vitam perdúcat ætérnam.
R. Amen.

Breviarium Romanum

textus in versione electronica © 2000-2023 Ing. Karel Mracek Dr.h.c. (fr. Pavel, diaconus, CZ)