☼ lat ☰

BREVIARIUM ROMANUM

7 november 2023
Pro O.P.: Omnium sanctorum Ordinis Prædicatorum, festum

AD VESPERAS


Hodierna celebritate, fideliter memoriam recolimus «illorum qui in Familia S. Dominici nos præcesserunt et conversatione exemplum, communione consortium et intercessione subsidium nobis præbent», ut «ad eorum imitationem excitemur et in spiritu nostræ vocationis roboremur» (cf. LCO, nn. 16 et 67).

V. Deus, in adiutórium meum inténde.
R. Dómine, ad adiuvándum me festína.

Glória Patri et Fílio et Spirítui Sancto,
sicut erat in princípio et nunc et semper
et in sǽcula sæculórum. Amen.  Allelúia.

HYMNUS

Supérnæ matris gáudia
repræséntat Ecclésia;
dum festa colit ánnua,
suspírat ad perpétua.

Quam felix illa cévitas,
in qua iugis sollémnitas;
et quam iucúnda cúria,
quæ curæ prorsus néscia.

Illic patres dispósiti
pro dignitáte mériti,
semóta iam calígine,
lumen vident in lúmine.

Hi sancti quorum hódie
recenséntur sollémnia,
nunc reveláta fácie
Regem cernunt in glória.

Illic Regína vírginum,
transcéndens culmen órdinum,
excúset apud Dóminum
nostrórum lapsus críminum.

Nos ad sanctórum glóriam,
ipsórum per suffrágia,
præséntem post misériam,
perdúcat Christi grátia.

Vel:

Iesu, corona cǽlitum,
María, cæli gáudium,
Deo fruéntes Angeli,
audíte vota súpplicum.

Vos, Patriarchárum chori
vatúmque turmæ nóbiles,
vos, príncipes Apóstoli,
vos, purpuráti Mártyres.

Vos, iuncta Confessóribus
amœna castra Vírginum,
anachoretárum greges,
nostris favéte pláusibus.

Vestris enim concívibus
nostram proféssis régulam
hæc iubilántis Ordinis
dicáta sunt sollémnia.

His ínclitis paréntibus
congratulántur fílii,
illústre quos consórtium
vestri beat collégii.

Sit laus Patri cum Fílio
et utriúsque Flámini,
quos vestra felix cívitas
hymno celébrat pérpeti.

PSALMODIA

Ant. 1 Vos, qui reliquístis ómnia et secúti estis me, céntuplum accipiétis et vitam ætérnam possidébitis.

Psalmus 87 (88)
Hominis graviter ægrotantis oratio

Hæc est hora vestra et potestas tenebrarum. (Lc 22, 53)

2 Dómine, Deus salútis meæ, *
      in die clamávi et nocte coram te.
3 Intret in conspéctu tuo orátio mea; *
      inclína aurem tuam ad precem meam. –

4 Quia repléta est malis ánima mea, *
      et vita mea inférno appropinquávit.
5 Æstimátus sum cum descendéntibus in lacum, *
      factus sum sicut homo sine adiutório.
6 Inter mórtuos liber, *
      sicut vulneráti dormiéntes in sepúlcris;
   quorum non es memor ámplius, *
      et ipsi de manu tua abscíssi sunt. –

7 Posuísti me in lacu inferióri, *
      in tenebrósis et in umbra mortis.
8 Super me gravátus est furor tuus, *
      et omnes fluctus tuos induxísti super me.

9 Longe fecísti notos meos a me, *
       posuísti me abominatiónem eis;
    conclúsus sum et non egrédiar. *
10    Oculi mei languérunt præ afflictióne.
    Clamávi ad te, Dómine, tota die, *
       expándi ad te manus meas.

11 Numquid mórtuis fácies mirabília, *
       aut surgent umbræ et confitebúntur tibi?
12 Numquid narrábit áliquis in sepúlcro misericórdiam tuam *
       et veritátem tuam in loco perditiónis?
13 Numquid cognoscéntur in ténebris mirabília tua *
       et iustítia tua in terra obliviónis? –

14 Et ego ad te, Dómine, clamávi, *
       et mane orátio mea prævéniet te.
15 Ut quid, Dómine, repéllis ánimam meam, *
       abscóndis fáciem tuam a me?
16 Pauper sum ego et móriens a iuventúte mea; *
       portávi pavóres tuos et conturbátus sum.
17 Super me transiérunt iræ tuæ, *
       et terróres tui excidérunt me.
18 Circuiérunt me sicut aqua tota die, *
       circumdedérunt me simul.
19 Elongásti a me amícum et próximum, *
       et noti mei sunt ténebræ.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 1 Vos, qui reliquístis ómnia et secúti estis me, céntuplum accipiétis et vitam ætérnam possidébitis.

Ant. 2 Veníte, benedícti Patris mei, possidéte parátum vobis regnum a constitutióne mundi.

Psalmus 96 (97)
Gloria Domini in iudicio

Hic psalmus salutem mundi significat et fidem omnium gentium in ipsum. (S. Athanasius)

1 Dóminus regnávit! Exsúltet terra, *
      læténtur ínsulæ multæ.
2 Nubes et calígo in circúitu eius, *
      iustítia et iudícium firmaméntum sedis eius.
3 Ignis ante ipsum præcédet *
      et inflammábit in circúitu inimícos eius.
4 Illustrárunt fúlgura eius orbem terræ: *
      vidit et contrémuit terra.
5 Montes sicut cera fluxérunt a fácie Dómini, *
      a fácie Dómini omnis terra.
6 Annuntiavérunt cæli iustítiam eius, *
      et vidérunt omnes pópuli glóriam eius. –

7 Confundántur omnes, qui adórant sculptília †
      et qui gloriántur in simulácris suis. *
      Adoráte eum, omnes ángeli eius.
8 Audívit et lætáta est Sion, †
      et exsultavérunt fíliæ Iudæ *
      propter iudícia tua, Dómine.
9 Quóniam tu Dóminus, Altíssimus super omnem terram, *
       nimis exaltátus es super omnes deos. –

10 Qui dilígitis Dóminum, odíte malum; †
       custódit ipse ánimas sanctórum suórum, *
       de manu peccatóris liberábit eos.
11 Lux orta est iusto, *
       et rectis corde lætítia.
12 Lætámini, iusti, in Dómino *
       et confitémini memóriæ sanctitátis eius.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 2 Veníte, benedícti Patris mei, possidéte parátum vobis regnum a constitutióne mundi.

Ant. 3 In Fílio suo elégit nos Deus in laudem glóriæ grátiæ suæ.

Vel, præsertim in cantu: Redemísti nos, Dómine Deus, in sánguine tuo ex omni tribu et lingua et pópulo et natióne: et fecísti nos Deo nostro regnum.

Canticum
Christus primogenitus omnis creaturæ et primogenitus ex mórtuis
Cf. Col 1, 12-20

12 Grátias agámus Deo Patri, *
       qui idóneos nos fecit in partem sortis sanctórum in lúmine,
13 qui erípuit nos de potestáte tenebrárum*
       et tránstulit in regnum Fílii dilectiónis suæ,
14 in quo habémus redemptiónem, *
       remissiónem peccatórum; –

15 qui est imágo Dei invisíbilis, *
       primogénitus omnis creatúræ,
16 quia in ipso cóndita sunt univérsa †
       in cælis et in terra, *
       visibília et invisibília,
    sive throni sive dominatiónes *
       sive principátus sive potestátes. –

    Omnia per ipsum et in ipsum creáta sunt, †
17    et ipse est ante ómnia, *
       et ómnia in ipso constant. –

18 Et ipse est caput córporis ecclésiæ; †
       qui est princípium, primogénitus ex mórtuis, *
       ut sit in ómnibus ipse primátum tenens,
19 quia in ipso complácuit omnem plenitúdinem habitáre *
       et per eum reconciliáre ómnia in ipsum,
20 pacíficans per sánguinem crucis eius, *
       sive quæ in terris sive quæ in cælis sunt.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 3 In Fílio suo elégit nos Deus in laudem glóriæ grátiæ suæ.

Vel, præsertim in cantu: Redemísti nos, Dómine Deus, in sánguine tuo ex omni tribu et lingua et pópulo et natióne: et fecísti nos Deo nostro regnum.

LECTIO BREVIS

Phil 1, 3-5a.7-8
Grátias ago Deo meo in omni memória vestri, semper in omni oratióne mea pro ómnibus vobis cum gáudio deprecatiónem fáciens, super communióne vestra in Evangélio; sicut est mihi iustum hoc sentíre pro ómnibus vobis, eo quod hábeam in corde vos, et in vínculis meis et in defensióne et confirmatióne Evangélii socios grátiæ meæ omnes vos esse. Testis enim mihi Deus, quómodo cúpiam omnes vos in viscéribus Christi Iesu.

RESPONSORIUM BREVE
V. Hæc est vera fratérnitas * quæ Christi amóre vicit sǽculi ténebras.
R. Hæc est vera fratérnitas * quæ Christi amóre vicit sǽculi ténebras.
V. Inclita tenens regna cæléstia.
R. Quæ Christi amóre vicit sǽculi ténebras.
V. Glória Patri et Fílio * et Spirítui Sancto.
R. Hæc est vera fratérnitas * quæ Christi amóre vicit sǽculi ténebras.

MAGNIFICAT

Ad Magnificat, ant. Christi pia grátia sanctos sublimávit quos Patris Domínici Ordo propagávit: nos eórum méritis pétimus iuvári, atque suis précibus Deo commendári.

Vel, præsertim in cantu: Domum tuam, Dómine, decet sanctitúdo, qua in terris mícuit fratrum multitúdo.

Exsultatio animæ in Domino

Lc 1, 46-55

46 Magníficat *
     ánima mea Dóminum,
47 et exsultávit spíritus meus *
      in Deo salvatóre meo,
48 quia respéxit humilitátem ancíllæ suæ. *
      Ecce enim ex hoc beátam me dicent omnes generatiónes,
49 quia fecit mihi magna, qui potens est, *
      et sanctum nomen eius,
50 et misericórdia eius in progénies et progénies *
      timéntibus eum.

51 Fecit poténtiam in bráchio suo, *
      dispérsit supérbos mente cordis sui;
52 depósuit poténtes de sede *
      et exaltávit húmiles;
53 esuriéntes implévit bonis *
      et dívites dimísit inánes.

54 Suscépit Israel púerum suum, *
      recordátus misericórdiæ,
55 sicut locútus est ad patres nostros, *
      Abraham et sémini eius in sǽcula.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ad Magnificat, ant. Christi pia grátia sanctos sublimávit quos Patris Domínici Ordo propagávit: nos eórum méritis pétimus iuvári, atque suis précibus Deo commendári.

Vel, præsertim in cantu: Domum tuam, Dómine, decet sanctitúdo, qua in terris mícuit fratrum multitúdo.

PRECES
Oculis in cælum sublevátis et concórdi cum beátis frátribus voce Dóminum flagitémus:
     Sancti simus, quia tu sanctus es.

Cum beáta María Vírgine, Fílii tui matre, cuius tutélæ Ordinem Prædicatórum commisísti, verba tua auscultáre vólumus:
— itaque da nobis, Dómine, cor húmile et atténtum.
Cum beáto Domínico, Patre nostro, cui verbi ministérium contulísti, evangélium regni mundo nuntiáre inténdimus:
— vitam ígitur nostram fac verbo tuo confórmem.
Cum frátribus nostris martýribus, qui córpora tibi hóstiam vivéntem exhibuérunt, testimónium tibi réddere vólumus:
— præsta nobis ut crucem parátam quotídie fórtiter portémus.
Cum frátribus et soróribus nostris post fructuósam vitam ædes tuas ingréssis sperámus ad cænam ætérnam admítti:
— fac ut spes nostra non confundátur.
Cunctis famíliæ nostræ sodálibus et benefactóribus defúnctis
— benígnus tríbue ut in ætérnum apud te máneant.
[ Spíritu Christi, quo clamámus « Abba Pater », Christi oratiónem dicámus:]

Pater noster, qui es in cælis,
sanctificétur nomen tuum;
advéniat regnum tuum;
fiat volúntas tua, sicut in cælo et in terra.
Panem nostrum cotidiánum da nobis hódie;
et dimítte nobis débita nostra,
sicut et nos dimíttimus debitóribus nostris;
et ne nos indúcas in tentatiónem;
sed líbera nos a malo.

Pater noster.....


ORATIO
Deus, omnis fons sanctitátis, qui Ecclésiam tuam váriis sanctórum Ordinis prædicatórum donis ditáre dignátus es, da nobis ita eórum sequi vestígia, ut quos hódie sub una celebritáte venerámur in terris, iis perpétua tandem festivitáte associémur in cælis. Per Dóminum nostrum Iesum Christum, Fílium tuum, qui tecum vivit et regnat in unitáte Spíritus Sancti, Deus, per ómnia sǽcula sæculórum.

    Deinde, si præest sacerdos vel diaconus, populum dimittit, dicens:

Dóminus vobíscum.
R. Et cum spíritu tuo.
Benedícat vos omnípotens Deus,
Pater, et Fílius, † et Spíritus Sanctus.
R. Amen.

    Vel alia formula benedictionis, sicut in Missa.
    Et, si fit dimissio, sequitur invitatio:

Ite in pace. 
R. Deo grátias. 

    Absente sacerdote vel diacono, et in recitatione a solo, sic concluditur:

Dóminus nos benedícat,
et ab omni malo deféndat,
et ad vitam perdúcat ætérnam.
R. Amen.

Breviarium Romanum

textus in versione electronica © 2000-2023 Ing. Karel Mracek Dr.h.c. (fr. Pavel, diaconus, CZ)