☼ lat ☰

BREVIARIUM ROMANUM

4 october 2029
Pro O.P.: S. Francisci Assisiensis, diaconi, festum

AD VESPERAS


Hodierna festivitas in liturgia Ordinis nostri singulare exprimit fraternitatis vinculum inter Fratres Minores et Prædicatores, ob utriusque Ordinis Fundatorum affinitatem in eorum historica missione pro Ecclesiæ ædificatione. Ipsi, ut pulchre meminit sancta Catharina Senensis, «vere fuerunt duæ columnæ in Ecclésia sancta: Franciscus cum paupertate, quæ sibi principaliter fuit propria, Dominicus vero cum scientia» (Dialogo, 158). Eandem sequentes viam, fideles docemur «discipulos fieri tam humilium Magistrorum» (Celano, Vita 2a, 149).
Franciscus, sancti Patris Dominici coævus (1182-1226), Christum pauperem admirabili simplicitate et crucifixum singulari caritate prosequens, ipsi conformis fieri studuit. Secundum Evangelii formam vivens multos ad se fratres et sorores attraxit, quos ad amorem paupertatis, Creatoris laudem et ad Ecclesiæ obœdientiam lætanter est hortatus. Vividis passionis Domini stigmatibus insignitus (1224) ad «sororem mortem» laetus adivit die 3 octobris 1226. Gregorius IX ipsum inter sanctos retulit anno 1228.

V. Deus, in adiutórium meum inténde.
R. Dómine, ad adiuvándum me festína.

Glória Patri et Fílio et Spirítui Sancto,
sicut erat in princípio et nunc et semper
et in sǽcula sæculórum. Amen.  Allelúia.

HYMNUS

Francíscus florens grátia
forma factus humílium
lætus potítur glória
sortis consors cæléstium.

Hic simplex, rectus, húmilis
pacis cultor amábilis
lumen in vase fíctili
ardens lucens in frágili.

Vili conténtus tégmine
sancto caléscit Flámine
vincit ardóre frígora
Christi dum gestat stígmata.

Pauper, nudus egréditur
cælum dives ingréditur
spargit virtútum múnera
ægris proflígat vúlnera.

Insígnis Pater páuperum
nos páuperes fac spíritu
consórtes redde súperum
eréptos ab intéritu.

Patri, Nato, Paráclito
decus, honor et glória
sint huius Sancti mérito
nobis ætérna gáudia. Amen.

PSALMODIA

Ant. 1 Iudicávi me nihil scire nisi Iesum Christum et hunc crucifíxum.

Psalmus 14 (15)
Quis dignus coram Domino?

Accessistis ad Sion montem et civitatem Dei viventis (Hebr 12, 22)

1 Dómine, quis habitábit in tabernáculo tuo? *
      Quis requiéscet in monte sancto tuo?

2 Qui ingréditur sine mácula et operátur iustítiam, *
      qui lóquitur veritátem in corde suo,
3 qui non egit dolum in lingua sua, †
      nec fecit próximo suo malum *
      et oppróbrium non íntulit próximo suo. –

4 Ad níhilum reputátus est in conspéctu eius malígnus, *
      timéntes autem Dóminum gloríficat.
5 Qui iurávit in detriméntum suum et non mutat, †
      qui pecúniam suam non dedit ad usúram *
      et múnera super innocéntem non accépit.

   Qui facit hæc, *
      non movébitur in ætérnum.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 1 Iudicávi me nihil scire nisi Iesum Christum et hunc crucifíxum.

Ant. 2 Configurátus morti eius ad cognoscéndum illum et virtútem resurrectiónis eius.

Psalmus 111 (112)
Viri iusti beatitudo

Ut filii lucis ambulate; fructus lucis est in omni bonitate et iustitia et veritate. (Eph 5, 8-9)

1 Beátus vir, qui timet Dóminum, *
      in mandátis eius cupit nimis.
2 Potens in terra erit semen eius, *
      generátio rectórum benedicétur.
3 Glória et divítiæ in domo eius, *
      et iustítia eius manet in sǽculum sǽculi. –

4 Exórtum est in ténebris lumen rectis, *
      miséricors et miserátor et iustus.
5 Iucúndus homo, qui miserétur et cómmodat, †
      dispónet res suas in iudício, *
6     quia in ætérnum non commovébitur. –

   In memória ætérna erit iustus, *
7     ab auditióne mala non timébit.
   Parátum cor eius, sperans in Dómino, †
8     confirmátum est cor eius, non timébit, *
      donec despíciat inimícos suos.
9 Distríbuit, dedit paupéribus; †
      iustítia eius manet in sǽculum sǽculi, *
      cornu eius exaltábitur in glória. –

10 Peccátor vidébit et irascétur, †
      déntibus suis fremet et tabéscet. *
      Desidérium peccatórum períbit.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 2 Configurátus morti eius ad cognoscéndum illum et virtútem resurrectiónis eius.

Ant. 3 Nunc facta est salus et regnum Dei nostri.

Canticum
De iudicio Dei
Ap 11, 17-18; 12, 10b-12a

11,17 Grátias ágimus tibi, *
           Dómine Deus omnípotens,
        qui es et qui eras, *
           quia accepísti virtútem tuam magnam et regnásti. –

    18 Et irátæ sunt gentes, *
           et advénit ira tua, et tempus mortuórum iudicári,
        et réddere mercédem servis tuis prophétis et sanctis *
           et timéntibus nomen tuum, pusíllis et magnis. –

12,10 Nunc facta est salus et virtus et regnum Dei nostri *
           et potéstas Christi eius,
        quia proiéctus est accusátor fratrum nostrórum, *
           qui accusábat illos ante conspéctum Dei nostri die ac nocte. –

    11 Et ipsi vicérunt illum propter sánguinem Agni *
           et propter verbum testimónii sui;
        et non dilexérunt ánimam suam *
           usque ad mortem.
    12 Proptérea lætámini, cæli *
           et qui habitátis in eis.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 3 Nunc facta est salus et regnum Dei nostri.

LECTIO BREVIS

Gal 6, 14. 17b-18
Mihi absit gloriári nisi in cruce Dómini nostri Iesu Christi, per quem mihi mundus crucifíxus est, et ego mundo. Ego enim stígmata Iesu in córpore meo porto. Grátia Dómini nostri Iesu Christi cum spíritu vestro, fratres. Amen.

RESPONSORIUM BREVE
V. Magna est, Dómine, glória eius * in salutári tuo.
R. Magna est, Dómine, glória eius * in salutári tuo.
V. Pones eum in benedictiónem in sǽculum sǽculi.
R. In salutári tuo.
V. Glória Patri et Fílio * et Spirítui Sancto.
R. Magna est, Dómine, glória eius * in salutári tuo.

MAGNIFICAT

Ad Magnificat, ant. Oculus Dei respéxit illum in bono et eréxit eum ab humilitáte ipsíus, et exaltávit caput eius: et miráti sunt in illo multi et laudavérunt Dóminum.

Vel, præsertim in cantu:
Vivo autem ego iam non ego, vivit vero in me Christus: ego enim stígmata Dómini Iesu in córpore meo porto.

Exsultatio animæ in Domino

Lc 1, 46-55

46 Magníficat *
     ánima mea Dóminum,
47 et exsultávit spíritus meus *
      in Deo salvatóre meo,
48 quia respéxit humilitátem ancíllæ suæ. *
      Ecce enim ex hoc beátam me dicent omnes generatiónes,
49 quia fecit mihi magna, qui potens est, *
      et sanctum nomen eius,
50 et misericórdia eius in progénies et progénies *
      timéntibus eum.

51 Fecit poténtiam in bráchio suo, *
      dispérsit supérbos mente cordis sui;
52 depósuit poténtes de sede *
      et exaltávit húmiles;
53 esuriéntes implévit bonis *
      et dívites dimísit inánes.

54 Suscépit Israel púerum suum, *
      recordátus misericórdiæ,
55 sicut locútus est ad patres nostros, *
      Abraham et sémini eius in sǽcula.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ad Magnificat, ant. Oculus Dei respéxit illum in bono et eréxit eum ab humilitáte ipsíus, et exaltávit caput eius: et miráti sunt in illo multi et laudavérunt Dóminum.

Vel, præsertim in cantu:
Vivo autem ego iam non ego, vivit vero in me Christus: ego enim stígmata Dómini Iesu in córpore meo porto.

PRECES
Deum Patrem, fontem omnis sanctitátis deprecémur, ut per exémpla et intercessiónem beáti Patris Francísci ad vitam nos perdúcat sanctam, et dicámus:
     Te rogámus, audi nos.

Pater sancte, qui servum tuum Francíscum sectatórem Fílii tui perféctum effecísti,
— fac ut nos quoque eius vestígiis inhæréntes, Christi Evangélium fidéliter observémus.
Pater sancte, dírige pedes nostros in viam pacis quam Pater noster Francíscus nobis demonstrávit,
— ut in obœdiéntia, sine próprio, et in castitáte, sincéro corde vivámus.
Pater sancte, qui supérbos dispérdis, et húmiles exáltas,
— concéde ut Patrem seráphicum in humilitáte sectémur.
Pater sancte, qui servum tuum Francíscum passiónis Fílii tui sacris stigmátibus insignísti,
— doce nos in cruce Dómini nostri Iesu Christi semper gloriári.
Pater sancte, qui précibus beáti Patris Francísci peccatóribus véniam contulísti,
— frátribus defúnctis lumen vultus tui benígnus osténde.
[Qui uníus Patris fílii sumus et unánimes habitámus in domo, cum Iesu Christo, primogénito eius, una voce dicámus:]

Pater noster, qui es in cælis,
sanctificétur nomen tuum;
advéniat regnum tuum;
fiat volúntas tua, sicut in cælo et in terra.
Panem nostrum cotidiánum da nobis hódie;
et dimítte nobis débita nostra,
sicut et nos dimíttimus debitóribus nostris;
et ne nos indúcas in tentatiónem;
sed líbera nos a malo.

Pater noster.....


ORATIO
Deus, qui seráphico Patri Francísco, paupertáte et humilitáte Christo configurári tribuísti, concéde ut, per illíus sémitas gradiéntes, Fílium tuum sequi, et tibi coniúngi læta valeámus caritáte. Per Dóminum nostrum Iesum Christum, Fílium tuum, qui tecum vivit et regnat in unitáte Spíritus Sancti, Deus, per ómnia sǽcula sæculórum.
Vel:
Ecclésiam tuam, quǽsumus, Dómine, grátia cæléstis amplíficet, quam beáti Patris nostri Francísci illumináre voluísti gloriósis méritis et exémplis. Per Dóminum nostrum Iesum Christum, Fílium tuum, qui tecum vivit et regnat in unitáte Spíritus Sancti, Deus, per ómnia sǽcula sæculórum.

    Deinde, si præest sacerdos vel diaconus, populum dimittit, dicens:

Dóminus vobíscum.
R. Et cum spíritu tuo.
Benedícat vos omnípotens Deus,
Pater, et Fílius, † et Spíritus Sanctus.
R. Amen.

    Vel alia formula benedictionis, sicut in Missa.
    Et, si fit dimissio, sequitur invitatio:

Ite in pace. 
R. Deo grátias. 

    Absente sacerdote vel diacono, et in recitatione a solo, sic concluditur:

Dóminus nos benedícat,
et ab omni malo deféndat,
et ad vitam perdúcat ætérnam.
R. Amen.

Breviarium Romanum

textus in versione electronica © 2000-2023 Ing. Karel Mracek Dr.h.c. (fr. Pavel, diaconus, CZ)