BREVIARIUM ROMANUM

18 november 2028
XXXIII DOMINICA PER ANNUM

V. Deus, in adiutórium meum inténde.
R. Dómine, ad adiuvándum me festína.

Glória Patri et Fílio et Spirítui Sancto,
sicut erat in princípio et nunc et semper
et in sǽcula sæculórum. Amen.  Allelúia.

HYMNUS

Deus, creátor ómnium
políque rector, véstiens
diem decóro lúmine,
noctem sopóris grátia.

Artus solútos ut quies
reddat labóris úsui
mentésque fessas állevet
luctúsque solvat ánxios.

Grates perácto iam die
et noctis exórtu preces,
voti reos ut ádiuves,
hymnum canéntes sólvimus.

Te cordis ima cóncinant,
te vox canóra cóncrepet,
te díligat castus amor,
te mens adóret sóbria.

Ut cum profúnda cláuserit
diem calígo nóctium,
fides tenébras nésciat
et nox fide relúceat.

Christum rogámus et Patrem,
Christi Patrísque Spíritum;
unum potens per ómnia,
fove precántes, Trínitas. Amen.

PSALMODIA

Ant. 1 Dirigátur, Dómine, orátio mea sicut incénsum in conspéctu tuo.

Et ascendit fumus incensorum de orationibus sanctorum de manu angeli coram Deo. (Ap 8, 4)

¹ Dómine, clamávi ad te, ad me festína; *
      inténde voci meæ, cum clamo ad te.
² Dirigátur orátio mea sicut incénsum in conspéctu tuo, *
      elevátio mánuum meárum ut sacrifícium vespertínum. –

³ Pone, Dómine, custódiam ori meo *
      et vigíliam ad óstium labiórum meórum.
⁴ Non declínes cor meum in verbum malítiæ *
      ad machinándas machinatiónes in impietáte
   cum homínibus operántibus iniquitátem; *
      et non cómedam ex delíciis eórum.
⁵ Percútiat me iustus in misericórdia et íncrepet me; †
      óleum autem peccatóris non impínguet caput meum, *
      quóniam adhuc et orátio mea in malítiis eórum. –

⁶ Deiécti in manus duras iúdicum eórum, *
      áudient verba mea, quóniam suávia erant.
⁷ Sicut frusta dolántis et dirumpéntis in terra, *
      dissipáta sunt ossa eórum ad fauces inférni. –

⁸ Quia ad te, Dómine, Dómine, óculi mei; *
      ad te confúgi, non effúndas ánimam meam.
⁹ Custódi me a láqueo, quem statuérunt mihi, *
      et a scándalis operántium iniquitátem. –
     ¹⁰  [Cadent in retiacula sua peccatores simul, *
         ego autem ultra pertranseam.]

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 1 Dirigátur, Dómine, orátio mea sicut incénsum in conspéctu tuo.

Ant. 2 Tu es refúgium meum, Dómine, pórtio mea in terra vivéntium.

Hæc omnia in Domino tempore passionis impleta sunt. (S. Hilarius)

² Voce mea ad Dóminum clamo, *
      voce mea ad Dóminum déprecor;
³ effúndo in conspéctu eius lamentatiónem meam, *
      et tribulatiónem meam ante ipsum pronúntio. –

⁴ Cum déficit in me spíritus meus, *
      tu nosti sémitas meas.
   In via, qua ambulábam, *
      abscondérunt láqueum mihi.
⁵ Considerábam ad déxteram et vidébam, *
      et non erat qui cognósceret me.
   Périit fuga a me, *
      et non est qui requírat ánimam meam. –

⁶ Clamávi ad te, Dómine; †
      dixi: "Tu es refúgium meum, *
      pórtio mea in terra vivéntium.
⁷ Inténde ad deprecatiónem meam, *
      quia humiliátus sum nimis.
   Líbera me a persequéntibus me, *
      quia confortáti sunt super me. –

⁸ Educ de custódia ánimam meam *
      ad confiténdum nómini tuo;
   me circúmdabunt iusti, *
      cum retribúeris mihi."

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 2 Tu es refúgium meum, Dómine, pórtio mea in terra vivéntium.

Ant. 3 Humiliávit semetípsum Dóminus Iesus, propter quod et Deus exaltávit illum in sǽcula.

⁶ Christus Iesus, cum in forma Dei esset, *
      non rapínam arbitrátus est esse se æquálem Deo,
⁷  sed semetípsum exinanívit formam servi accípiens, †
      in similitúdinem hóminum factus; *
      et hábitu invéntus ut homo,
⁸ humiliávit semetípsum †
      factus obœdiens usque ad mortem, *
      mortem autem crucis. –

⁹ Propter quod et Deus illum exaltávit †
      et donávit illi nomen, *
      quod est super omne nomen,
¹⁰ ut in nómine Iesu omne genu flectátur *
       cæléstium et terréstrium et infernórum
    et omnis lingua confiteátur: *
¹¹   «Dóminus Iesus Christus», in glóriam Dei Patris.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 3 Humiliávit semetípsum Dóminus Iesus, propter quod et Deus exaltávit illum in sǽcula.

LECTIO BREVIS

RESPONSORIUM BREVE
V. Quam magnificáta sunt * ópera tua, Dómine.
R. Quam magnificáta sunt * ópera tua, Dómine.
V. Omnia in sapiéntia fecísti.
R. Opera tua, Dómine.
V. Glória Patri et Fílio * et Spirítui Sancto.
R. Quam magnificáta sunt * ópera tua, Dómine.

MAGNIFICAT

Ad Magnificat, ant. Cum audiéritis prœlia et seditiónes, nolíte terréri; opórtet enim primum hæc fíeri, sed non statim finis, dicit Dóminus.

⁴⁶ Magníficat *
     ánima mea Dóminum,
⁴⁷ et exsultávit spíritus meus *
      in Deo salvatóre meo,
⁴⁸ quia respéxit humilitátem ancíllæ suæ. *
      Ecce enim ex hoc beátam me dicent omnes generatiónes,
⁴⁹ quia fecit mihi magna, qui potens est, *
      et sanctum nomen eius,
⁵⁰ et misericórdia eius in progénies et progénies *
      timéntibus eum.

⁵¹ Fecit poténtiam in bráchio suo, *
      dispérsit supérbos mente cordis sui;
⁵² depósuit poténtes de sede *
      et exaltávit húmiles;
⁵³ esuriéntes implévit bonis *
      et dívites dimísit inánes.

⁵⁴ Suscépit Israel púerum suum, *
      recordátus misericórdiæ,
⁵⁵ sicut locútus est ad patres nostros, *
      Abraham et sémini eius in sǽcula.

Ad Magnificat, ant. Cum audiéritis prœlia et seditiónes, nolíte terréri; opórtet enim primum hæc fíeri, sed non statim finis, dicit Dóminus.

PRECES
Uni Deo, Patri et Fílio et Spirítui Sancto, glóriam dicéntes, humíliter deprecémur:
     Adésto pópulo tuo, Dómine.

Dómine sancte, Pater omnípotens, fac ut in terra nostra oriátur iustítia,
— et sedébit pópulus tuus in pulchritúdine pacis.
Da plenitúdinem géntium in regnum tuum intráre,
— et sic omnes pópuli salvi fient.
Præsta ut in tua pace cóniuges máneant et voluntáte,
— atque in mútua semper caritáte vivant.
Remunerári dignáre, Dómine, omnes nobis bona faciéntes,
— et vitam ætérnam da eis.
Odio et bellis perémptos réspice miserátus,
— eos in cæléstem réquiem dignáre suscípere.

Pater noster, qui es in cælis,
sanctificétur nomen tuum;
advéniat regnum tuum;
fiat volúntas tua, sicut in cælo et in terra.
Panem nostrum cotidiánum da nobis hódie;
et dimítte nobis débita nostra,
sicut et nos dimíttimus debitóribus nostris;
et ne nos indúcas in tentatiónem;
sed líbera nos a malo.

Pater noster.....

ORATIO
Da nobis, quǽsumus, Dómine Deus noster, in tua semper devotióne gaudére, quia perpétua est et plena felícitas, si bonórum ómnium iúgiter serviámus auctóri. Per Dóminum nostrum Iesum Christum, Fílium tuum, qui tecum vivit et regnat in unitáte Spíritus Sancti, Deus, per ómnia sǽcula sæculórum.

    Deinde, si præest sacerdos vel diaconus, populum dimittit, dicens:

Dóminus vobíscum.
R. Et cum spíritu tuo.
Benedícat vos omnípotens Deus,
Pater, et Fílius, † et Spíritus Sanctus.
R. Amen.

    Vel alia formula benedictionis, sicut in Missa.
    Et, si fit dimissio, sequitur invitatio:

Ite in pace. 
R. Deo grátias. 

    Absente sacerdote vel diacono, et in recitatione a solo, sic concluditur:

Dóminus nos benedícat,
et ab omni malo deféndat,
et ad vitam perdúcat ætérnam.
R. Amen.

Breviarium Romanum

textus in versione electronica © 2000-2023 Ing. Karel Mracek Dr.h.c. (fr. Pavel, diaconus, CZ)