[ Coniunctiones abscondere ]

« Ianuarius 2020 »
DoIIIIIIVVVISa
 1234
567891011
12131415161718
19202122232425
262728293031 


9. ianuarius 2020, Feria V.
hebd. II

Tempus nativitatis, hebd. II


ad invitatorium
ad officium lect.
ad laudes mat. - comb.
ad tertiam - compl.
ad sextam - compl.
ad nonam - compl.
ad vesperas
ad completorium


Communia non aplicare
ordinarium
horas componere
officum defunctorum
dedicationis ecclesiæ

Errata

BREVIARIUM ROMANUM

Denní modlitba církve (breviář) ze serveru http://breviar.op.cz

9 ianuarius 2020
Tempus nativitatis, hebd. II

AD SEXTAM

V. Deus, in adiutórium meum inténde.
R. Dómine, ad adiuvándum me festína.

Glória Patri et Fílio et Spirítui Sancto,
sicut erat in princípio et nunc et semper
et in sǽcula sæculórum. Amen.   Allelúia.

HYMNUS

Dicámus laudes Dómino
fervénte prompti spíritu;
hora volúta séxies
nos ad orándum próvocat.

In hac enim fidélibus
veræ salútis glória,
beáti Agni hóstia,
crucis virtúte rédditur.

Cuius luce claríssima
tenébricat merídies;
sumámus toto péctore
tanti splendóris grátiam.

Deo Patri sit glória
eiúsque soli Fílio
cum Spíritu Paráclito,
in sempitérna sǽcula. Amen.

PSALMODIA

Ant. Véniens Christus evangelizávit pacem vobis, qui longe fuístis, et pacem iis qui prope erant.

Psalmus 118 (119), 65-72
IX (Teth)

65 Bonitátem fecísti cum servo tuo, Dómine, *
      secúndum verbum tuum.

66 Bonitátem et prudéntiam et sciéntiam doce me, *
      quia præcéptis tuis crédidi. –

67 Priúsquam humiliárer ego errávi; *
      nunc autem elóquium tuum custódiam.

68 Bonus es tu et benefáciens, *
      doce me iustificatiónes tuas. –

69 Excogitavérunt contra me dolósa supérbi, *
      ego autem in toto corde meo servábo mandáta tua.

70 Incrassátum est sicut adeps cor eórum, *
      ego vero in lege tua delectátus sum. –

71 Bonum mihi quia humiliátus sum, *
      ut discam iustificatiónes tuas.

72 Bonum mihi lex oris tui, *
      super mília auri et argénti.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Psalmus 55 (56), 2-7b. 9-14
Fiducia in Domini verbo collocata

Christus in passione monstratur. (S. Hieronymus)

2 Miserére mei, Deus, quóniam conculcávit me homo, *
      tota die impúgnans oppréssit me.

3 Conculcavérunt me inimíci mei tota die, *
      quóniam multi pugnant advérsum me, Altíssime. –

4 In quacúmque die timébo, *
      ego in te sperábo,

5 In Deo, cuius laudábo sermónem, †
      in Deo sperávi; *
      non timébo: quid fáciet mihi caro?

6 Tota die rem meam perturbábant, *
      advérsum me omnes cogitatiónes eórum in malum.

7 Concitábant iúrgia, insidiabántur, *
      ipsi calcáneum meum observábant. –

9 Peregrinatiónes meas tu numerásti: †
       pone lácrimas meas in utre tuo; *
       nonne in supputatióne tua? –

10 Tunc converténtur inimíci mei retrórsum, †
        in quacúmque die invocávero: *
        ecce cognóvi quóniam Deus meus es. –

11 In Deo, cuius laudábo sermónem, *
        in Dómino, cuius laudábo sermónem,

12 in Deo sperávi; *
        non timébo: quid fáciet mihi homo? –

13 Super me sunt, Deus, vota tua; *
        reddam laudatiónes tibi,

14 quóniam eripuísti ánimam meam de morte †
        et pedes meos de lapsu, *
        ut ámbulem coram Deo in lúmine vivéntium.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Psalmus 56 (57)
In afflictione oratio matutina

Passionem Domini cantat iste psalmus. (S. Augustinus)

2 Miserére mei, Deus, miserére mei, *
      quóniam in te cónfugit ánima mea;
   et in umbra alárum tuárum confúgiam, *
      donec tránseant insídiæ.
3 Clamábo ad Deum Altíssimum, *
      Deum, qui benefécit mihi. –

4 Mittet de cælo et liberábit me; †
      dabit in oppróbrium conculcántes me. *
      Mittet Deus misericórdiam suam et veritátem suam.
5 ánima mea recúmbit in médio catulórum leónum *
      devorántium fílios hóminum.
   Dentes eórum arma et sagíttæ *
      et lingua eórum gládius acútus. –

6 Exaltáre super cælos, Deus, *
      super omnem terram glória tua. –

7 Láqueum paravérunt pédibus meis, *
      et incurvávit se ánima mea;
   fodérunt ante fáciem meam fóveam, *
      et ipsi incidérunt in eam. –

8 Parátum cor meum, Deus, †
      parátum cor meum; *
      cantábo et psalmum dicam.
9 Exsúrge, glória mea, †
       exsúrge, psaltérium et cíthara, *
       excitábo auróram.
10 Confitébor tibi in pópulis, Dómine, *
       et psalmum dicam tibi in natiónibus,
11 quóniam magnificáta est usque ad cælos misericórdia tua *
       et usque ad nubes véritas tua. –

12 Exaltáre super cælos, Deus, *
       super omnem terram glória tua.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. Véniens Christus evangelizávit pacem vobis, qui longe fuístis, et pacem iis qui prope erant.

LECTIO BREVIS

Ap 21, 23-24
Cívitas non eget sole neque luna, ut lúceant ei, nam cláritas Dei illuminávit eam, et lucérna eius est Agnus. Et ambulábunt gentes per lumen eius, et reges terræ áfferunt glóriam suam in illam.


V. Vidébunt gentes iustum tuum.
R. Et cuncti reges ínclitum tuum.

ORATIO

Orémus:

Deus, illuminátor ómnium géntium, da pópulis tuis perpétua pace gaudére, et illud córdibus nostris spléndidum lumen infúnde, quod patrum nostrórum méntibus aspersísti. Per Christum Dóminum nostrum.

    Deinde, saltem in celebratione communi, additur acclamatio:

Benedicámus Dómino.
R. Deo grátias.

BREVIARIUM ROMANUM

textus in versione electronica © 2000-2019 Ing. Karel Mracek Dr.h.c. (fr. Pavel, diaconus)