☼ lat ☰

BREVIARIUM ROMANUM

29 ianuarius 2026
Pro O.P.: B. Villanæ delle Botti, matrisfamilias


Florentiæ in Italia orta anno 1332, a ditissimo patre negotiatore, adulescentiam facilem ac mutabilem duxit. Rosso Petri Benintendi homini diviti nuptui tradita, primum leviter vixit, festis, conviviis et saltationibus dedita. Tandem, post eventum portentosum, divinæ gratiæ lumine perfusa, pænitentia ducta, ad fratres Sanctæ Mariæ Novellæ cucurrit ut peccata confiteretur. Inde habitum sororum de Pænitentia S. Dominici impetravit, novam sub Fratrum Prædicatorum moderatione ingrediens viam. Tum ad studium Sacræ Scripturæ et ad contemplationem Christi Crucifixi intendens, austera vivendi ratione enituit multasque mulieres ad sui imitationem attraxit.

Fervida in Deum et proximos, liberaliter omnia bona sua pauperibus distribuit atque pro ipsis mendicavit étiam in viis Florentiæ. Cælestibus donis a Deo cumulata, obiit die 29 ianuarii 1361. Eius corpus expositum fuit per 37 dies ad venerationem populi in Ecclésia Sanctæ Mariæ Novellæ, ibique honorifice sepultum est. Die 27 martii 1824, a Leone XII eius cultus confirmatus fuit.

AD TERTIAM

V. Deus, in adiutórium meum inténde.
R. Dómine, ad adiuvándum me festína.

Glória Patri et Fílio et Spirítui Sancto,
sicut erat in princípio et nunc et semper
et in sǽcula sæculórum. Amen.   Allelúia.

HYMNUS

Certum tenéntes órdinem,
pio poscámus péctore
hora diéi tértia
trinæ virtútis glóriam,

Ut simus habitáculum
illi Sancto Spirítui,
qui quondam in apóstolis
hac hora distribútus est.

Hoc gradiénte órdine,
ornávit cuncta spléndide
regni cæléstis cónditor
ad nostra ætérna prǽmia.

Deo Patri sit glória
eiúsque soli Fílio
cum Spíritu Paráclito,
in sempitérna sǽcula. Amen.

PSALMODIA

Ant. 1 Súscipe me, Dómine, secúndum elóquium tuum, et vivam.

Psalmus 118 (119), 113-120
XV (Samech)

113 Dúplices corde ódio hábui *
         et legem tuam diléxi.
114 Tegmen et scutum meum es tu, *
         et in verbum tuum supersperávi. –

115 Declináte a me, malígni, *
         et servábo præcépta Dei mei.
116 Súscipe me secúndum elóquium tuum, et vivam; *
         et non confúndas me ab exspectatióne mea. –

117 Susténta me, et salvus ero *
         et delectábor in iustificatiónibus tuis semper.
118 Sprevísti omnes discedéntes a iustificatiónibus tuis, *
         quia mendácium cogitátio eórum. –

119 Quasi scóriam delésti omnes peccatóres terræ; *
         ídeo diléxi testimónia tua.
120 Hórruit a timóre tuo caro mea; *
         a iudíciis enim tuis tímui.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 1 Súscipe me, Dómine, secúndum elóquium tuum, et vivam.

Ant. 2 Adiuva nos, Deus salutáris nostri, et propítius esto peccátis nostris.

Psalmus 78 (79), 1-5. 8-11. 13
Super Ierusalem lamentatio

Si cognovisses et tu ... quæ ad pacem tibi! (Lc 19, 42)

1 Deus, venérunt gentes in hereditátem tuam, †
      polluérunt templum sanctum tuum, *
      posuérunt Ierúsalem in ruínas.
2 Dedérunt morticína servórum tuórum escas volatílibus cæli, *
      carnes sanctórum tuórum béstiis terræ.
3 Effudérunt sánguinem eórum tamquam aquam in circúitu Ierúsalem, *
      et non erat qui sepelíret.
4 Facti sumus oppróbrium vicínis nostris, *
      subsannátio et illúsio his, qui in circúitu nostro sunt. –

5 Usquequo, Dómine? †
      Irascéris in finem? *
      Accendétur velut ignis zelus tuus? –

   6     [Effunde iram tuam in gentes, quae te non noverunt, *
         et in regna, quae nomen tuum non invocaverunt,
   7     quia comederunt Iacob *
         et sedem eius desolaverunt.]

8 Ne memíneris iniquitátum patrum nostrórum, †
      cito antícipent nos misericórdiæ tuæ, *
      quia páuperes facti sumus nimis.
9 Adiuva nos, Deus salutáris nostri, *
      propter glóriam nóminis tui et líbera nos;
   et propítius esto peccátis nostris *
       propter nomen tuum. –

10 Quare dicent in géntibus: "Ubi est Deus eórum?" †
       Innotéscat in natiónibus coram óculis nostris *
       últio sánguinis servórum tuórum, qui effúsus est.
11 Intróeat in conspéctu tuo gémitus compeditórum; †
       secúndum magnitúdinem bráchii tui *
       supérstites relínque fílios mortis. –

   12     [Et redde vicinis nostris septuplum in sinu eorum, *
         improperium ipsorum, quod exprobraverunt tibi, Domine.]

13 Nos autem, pópulus tuus et oves páscuæ tuæ, *
       confitébimur tibi in sǽculum:
     in generatiónem et generatiónem *
       annuntiábimus laudem tuam.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 2 Adiuva nos, Deus salutáris nostri, et propítius esto peccátis nostris.

Ant. 3 Deus virtútum, réspice de cælo, et vísita víneam istam.

Psalmus 79 (80)
Visita, Domine, vineam tuam

Veni, Domine Iesu. (Ap 22, 20)

2 Qui pascis Israel, inténde, *
      qui dedúcis velut ovem Ioseph.
   Qui sedes super chérubim, effúlge *
3     coram Ephraim, Béniamin et Manásse.
   Excita poténtiam tuam et veni, *
      ut salvos fácias nos. –

4 Deus, convérte nos, *
      illústra fáciem tuam, et salvi érimus. –

5 Dómine Deus virtútum, *
      quoúsque irascéris super oratiónem pópuli tui?
6 Cibásti nos pane lacrimárum *
      et potum dedísti nobis in lácrimis copióse.
7 Posuísti nos in contradictiónem vicínis nostris, *
      et inimíci nostri subsannavérunt nos. –

8 Deus virtútum, convérte nos, *
      illústra fáciem tuam, et salvi érimus. –

9 Víneam de Ægýpto transtulísti, *
       eiecísti gentes et plantásti eam.
10 Purgásti locum in conspéctu eius, *
       plantásti radíces eius, et implévit terram.
11 Opérti sunt montes umbra eius *
       et ramis eius cedri Dei;
12 exténdit pálmites suos usque ad mare *
       et usque ad Flumen propágines suas. –

13 Ut quid destruxísti macériam eius, *
       et vindémiant eam omnes, qui prætergrediúntur viam?
14 Exterminávit eam aper de silva, *
       et singuláris ferus depástus est eam. –

15 Deus virtútum, convértere, *
       réspice de cælo et vide et vísita víneam istam. -

16 Et prótege eam, quam plantávit déxtera tua, *
       et super fílium hóminis, quem confirmásti tibi.
17 Incénsa est igni et suffóssa; *
       ab increpatióne vultus tui períbunt.
18 Fiat manus tua super virum déxteræ tuæ, *
       super fílium hóminis, quem confirmásti tibi.
19 Et non discedémus a te, vivificábis nos, *
       et nomen tuum invocábimus. –

20 Dómine Deus virtútum, convérte nos *
       et illústra fáciem tuam, et salvi érimus. –

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. 3 Deus virtútum, réspice de cælo, et vísita víneam istam.

LECTIO BREVIS

Sap 19, 22
In ómnibus magnificásti pópulum tuum, Dómine, et honorásti et non despexísti, in omni témpore et omni loco assístens eis.


V. Tu es Deus qui facis mirabília.
R. Notam fecísti in pópulis virtútem tuam.

ORATIO

Orémus:

Te, Dómine, supplíciter exorámus, ut qui hora tértia Spíritum Sanctum orántibus Apóstolis tribuísti, nobis eiúsdem grátiæ participatiónem concédas benígnus. Per Christum Dóminum nostrum.

    Deinde, saltem in celebratione communi, additur acclamatio:

Benedicámus Dómino.
R. Deo grátias.

Breviarium Romanum

textus in versione electronica © 2000-2023 Ing. Karel Mracek Dr.h.c. (fr. Pavel, diaconus, CZ)