☼ lat ☰

BREVIARIUM ROMANUM

31 december 2018
S. Silvestri I, papæ


Episcopus Ecclesiæ Romanæ anno 314 ordinatus, sub Constantino Magno rexit Ecclésiam, quo tempore Donatistarum schisma et Arianorum error maximas excitarunt calamitates. Mortuus est anno 335 et in cœmeterio Priscillæ, via Salaria, sepultus.

AD NONAM

V. Deus, in adiutórium meum inténde.
R. Dómine, ad adiuvándum me festína.

Glória Patri et Fílio et Spirítui Sancto,
sicut erat in princípio et nunc et semper
et in sǽcula sæculórum. Amen.   Allelúia.

HYMNUS

Rerum, Deus, tenax vigor,
immótus in te pérmanens,
lucis diúrnæ témpora
succéssibus detérminans,

Largíre clarum véspere,
quo vita numquam décidat,
sed prǽmium mortis sacræ
perénnis instet glória.

Præsta, Pater piíssime,
Patríque compar Unice,
cum Spíritu Paráclito
regnans per omne sǽculum. Amen.

PSALMODIA

Ant. Vidérunt óculi mei salutáre tuum, quod parásti ante fáciem ómnium populórum.

Psalmus 18 (19), 8-15
Laus Deo, legis Domino

Estote vos perfécti, sicut et Pater vester cælestis perfectus est. (Mt 5, 48)

8  Lex Dómini immaculáta, refíciens ánimam, *
      testimónium Dómini fidéle, sapiéntiam præstans párvulis.
9  Iustítiæ Dómini rectæ, lætificántes corda, *
      præcéptum Dómini lúcidum, illúminans óculos.
10 Timor Dómini mundus, pérmanens in sǽculum sǽculi, *
      iudícia Dómini vera, iusta ómnia simul,
11 desiderabília super aurum et lápidem pretiósum multum *
      et dulcióra super mel et favum stillántem. –

12 Etenim servus tuus erudítur in eis; *
      in custodiéndis illis retribútio multa.
13 Erróres quis intéllegit? †
      Ab occúltis munda me, *
14   et a supérbia custódi servum tuum, ne dominétur mei.
    Tunc immaculátus ero *
      et emundábor a delícto máximo. –

15 Sint ut compláceant elóquia oris mei *
      et meditátio cordis mei in conspéctu tuo.
    Dómine, adiútor meus *
      et redémptor meus.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Psalmus 7
Oratio iusti calumniam patientis

Ecce iudex ante ianuam assistit (Iac 5, 9)

I

2 Dómine Deus meus, in te sperávi; *
      salvum me fac ex ómnibus persequéntibus me et líbera me,
3 ne quando rápiat ut leo ánimam meam *
      discérpens, dum non est qui salvum fáciat. –

4 Dómine Deus meus, si feci istud, *
      si est iníquitas in mánibus meis
5 si réddidi retribuénti mihi mala *
      et exspoliávi inimícum meum dimíttens inánem,
6 persequátur inimícus ánimam meam et comprehéndat †
      et concúlcet in terra vitam meam *
      et glóriam meam in púlverem dedúcat. –

7 Exsúrge, Dómine, in ira tua *
      et exaltáre contra indignatiónem inimicórum meórum
   et exsúrge, Deus meus, *
      in iudício, quod mandásti.
8 Et synagóga populórum circúmdabit te, †
      et super hanc in altum regrédere: *
      Dóminus iúdicat pópulos.
9 Iúdica me, Dómine, secúndum iustítiam meam *
       et secúndum innocéntiam meam, quæ est in me.
10 Consumátur nequítia peccatórum; †
       et iustum confírma, *
       scrutans corda et renes Deus iustus.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

II

11 Adiutórium meum apud Deum, *
       qui salvos facit rectos corde.
12 Deus iudex iustus, *
       fortis, iráscens per síngulos dies.
13 Nonne íterum gládium suum exácuit, *
       arcum suum teténdit et parávit illum?
14 Et parávit sibi vasa mortis, *
       sagíttas suas ardéntes effécit. –

15 Ecce partúriit iniustítiam, *
       concépit dolórem et péperit iniquitátem;
16 lacum apéruit et effódit eum *
       et íncidit in fóveam, quam fecit.
17 Convertétur dolor eius in caput eius, *
       et in vérticem ipsíus iníquitas eius descéndet.
18 Confitébor Dómino secúndum iustítiam eius *
       et psallam nómini Dómini Altíssimi.

Glória Patri et Fílio *
    et Spirítui Sancto,
sicut erat in princípio et nunc et semper *
    et in sǽcula sæculórum. Amen.

Ant. Vidérunt óculi mei salutáre tuum, quod parásti ante fáciem ómnium populórum.

LECTIO BREVIS

Is 65, 1
Quæsítus sum ab his, qui non consulébant me, invéntus sum ab his, qui non quærébant me. Dixi: «Ecce ego, ecce ego!» ad gentem, quæ non invocábat nomen meum.


V. Misericórdia et véritas obviavérunt sibi, allelúia.
R. Iustítia et pax osculátæ sunt, allelúia.

ORATIO

Orémus:

Omnípotens sempitérne Deus, qui in Fílii tui nativitáte tribuísti totíus religiónis inítium perfectionémque constáre, da nobis, quǽsumus, in eius portióne censéri, in quo totíus salútis humánæ summa consístit. Per Christum Dóminum nostrum.

    Deinde, saltem in celebratione communi, additur acclamatio:

Benedicámus Dómino.
R. Deo grátias.

Breviarium Romanum

textus in versione electronica © 2000-2023 Ing. Karel Mracek Dr.h.c. (fr. Pavel, diaconus, CZ)